KUCHING: Perintah Sarawak ngaga pemutus nangguhka dulu sekeda achara besai berindik ari gaya sebun enggau gaya hari angat ke nuntung nengeri jam diatu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemutus nya digaga dikena bejaga lebih agi nyaga pengerai enggau pengelikun mensia mayuh.
“Perintah udah ngaga pemutus ngambi achara besai ditangguh dulu iya nya Hari Kebangsaan, Pengerami Maulidur Rasul enggau Program Sarawakku Sayang ke deka diatur kandang seminggu dua tu.
“Kitai enda tau enda nangguh, laban betati ke sida ke bisi ampus, irau ke gaya hari baka tu.
Kitai deka nyeliah penanggul, nya alai kitai nangguh dulu semua laban dua minggu tu kitai enda ulih ngatur,” ku iya.
Iya nyebut jaku nya lebuh dirandau pemberita pengudah Pengerami Bejadi AI For Makers: Borneo Makers Festival 2026 di TEGAS Digital Village, ditu Hari Minggu.
Berebak enggau nya, Datuk Patinggi Abang Zohari madah, Pengerami Nyambut Hari Malaysia Renggat Nasional 2026 ke ditaga kena 16 September agi bepanggai ba gaya hari enggau pemanah angin maya nya.
Iya nerang, pekara nya udah dipadah ngagai Menteri Besai, Dato’ Seri Anwar Ibrahim lebuh berandau di Brunei Darussalam empai lama.
Ku iya, sebun agi nyadi penanggul lebih agi adap Selatan Sarawak laban pengerami nya deka diatur di Kuching.
Nya alai ku iya, Perintah Sarawak deka terus matau gaya sebun enggau gaya hari sebedau ngatur sebarang pengawa bekaul pengerami besai deka datai. — EDISI UKAS
