Sekeda jalai alun di Dun Ngemah patut ditar

KUCHING: Perintah Sarawak dipinta beratika pengawa ngaga jalai ti meri empas besai ba Dun Ngemah.
Adun Ngemah Alexander Vincent madahka pekara tu maya bejuraika Rang Undang-Undang Perbekalan (2020) enggau mosyen bagi Resolusyen Angar Pemansang Belanja 2020 ba Aum Kedua Renggat Keempat Dun Ke-18 ditu, kemari.

“Aku ngarapka Perintah Sarawak ngetar jalai ari Batu Luking ngagai Rumah Catherine Pinit urung tujuk kilometer di sepemanjai Batang Rajang, sitak bansa China ari Sedaya nuju Lian Hap kira tujuh kilometer enggau jalai ari Kanowit-Kapit nuju pasar Nanga Dap tauka SMK Dap.

“Tiga bengkah jalai tu deka mutarka penanggul komuniti Iban ari rumah panjai enggau komuniti China ti diau ba pelilih Batang Rajang Dun Ngemah,” ku iya.

Kelimpah nya, iya mega minta ngambika penanggul ai enda deras ba pelilih jalai Nibong-Tada, Mapai, Bawan, Tuah, Pedai, Jih enggau Nanga Tada diperati opis menteri ti bekaul.

“Kelimpah bekal ai, aku mega minta bekal kuasa karan nuju rumah panjai Tinggai, Rumah Brain, Rumah Dandi enggau Rumah Taboh di Sungai Pedai disambung,” ku iya.

Tambah iya, rumah panjai di Nanga Jagau ti digaga ba atas bukit bisi dipeda enda likun ari penusah tanah runtuh.
“Aku ngarapka Perintah Sarawak muka Palan Pemansang Besepadu Ngemah (NIDA) dikena ngemansangka pelilih ti komprehensif di Sungai Ngemah enggau Sungai Kabah.

“Tu nyengkaum nambahka pemansang infrastruktur ti lebih likun, nyendiaka palan berumah ti tesusun enggau ngatur aktiviti sosio-ekonomi dikena nambahka penatai pemisi sida,” ku iya.

Ku iya, pengawa tu dikena meri tanda basa ngagai peranak ti diau dia laban ti udah nyanggup diasuh pindah ba Operasyen Bebatak enggau Operasyen Empuru 46 taun ti udah.

Maya Operasyen Bebatak enggau Operasyen Empuru digaga ba taun 1970 lebih kurang 7,600 ari 1,154 ruang bilik ti datai ari 74 buah rumah panjai di sitak Sungai Ngemah enggau Sungai Kabah dipindahka ngagai Palan Penempatan Rascom di Sekuau, Tada Ngungun enggau Jagau.