Sekelim Tuak MPDC laku lepas kena viral

Patrila rindu ngaga pemakai ti nyelai tauka enda kala digaga orang bukai

“Aku nemu bedau bisi orang udah ngaga sekelim tuak baka ke digaga aku diatu.”

KOTA SAMARAHAN: Pengerindu ngaga penyelai ari orang bukai ngujungka Patrila Augustine ngaga sekelim tuak.

Patrila, 52 taun ari menua Betong madah diri rindu ngaga pemakai ti nyelai tauka enda kala digaga orang bukai.

“Ketegal pengerindu ngaga pekara ti lain ari orang bukai, nya kebuah aku ngaga sekelim tuak tu.

“Aku nemu bedau bisi orang udah ngaga sekelim tuak baka ke digaga aku diatu,” ku iya.

Ngepunka pengawa bedagang pemakai Dayak ari taun 2011, Patrila tauka kelala agi enggau nama Mummy Patz madah nyual sekelim tuak berengkah ari iya muka kedai iya ke diatu, Mummy Patz Dayak Cafe (MPDC).

NYAMAI… Sekelim Tuak Viral ba Mummy Patz Dayak Cafe.

“Tuak sekelim nya udah lama ku nyual, dalam sebulan lebih tu.

“Tang dalam seminggu tu iya ke viral ba dalam Facebook lalu sekelim tuak suah endar abis pengudah nya,” ku iya.

Mummy Patz madah iya milih tuak digaga nyadi sekelim laban asai ti konsisten sereta enda berubah.

“Tuak tu kitai nemu asai iya konsisten sereta nadai timpuh alai iya jai.

TAU SEPI DULU…Penanyi tebilang Iban, Melissa Francis mega bisi nguji ensepi sekelim tuak digaga Mummy Patz.

“Lalu asai sekelim endang kitai nemu meseti ka manis, nya alai aiskrim tuak tu sigi manis diempa,” ku iya.

Iya mega madahka diri ngambi tuak tu ari siku orang ke dipechaya iya empu, ke ditemu iya bisi ngaga tuak.

Nengah sekelim tuak tu, aku ukai semina meri pekara baru iya nya sekelim tuak tang mega ngelakuka tuak, kelai bansa Dayak, ku iya.

“Aku enda berani ngambi tuak ari orang ke enda dikelala aku laban aku enggai asai tuak nya berubah.

“Mayuh udah orang minta aku nyual sekelim tuak roselle, tang ke bukai tang aku enda berani laban aku irau asai iya enda sebaka,” ku iya nerang.

Mummy Patz mega madah sekelim tuak tu asai tapai, lalu enda ngasuh mabuk sereta nyamai diempa lebuh hari angat.

Selalu iya, orang ke meli sekelim tu siku sebatang sekelim laban deka nguji, ku iya.

Nangkanka nya, ku iya, madah sekelim nya dijual enggau rega RM 4 sebatang ketegal puku ngaga tuak ti besai.

“Rega RM 4 kira ngena enggau puku ngaga tuak, ka nyual lebih ari nya, enggai nyadi laban orang dah nemu rega iya sigi nya.

“Sekelim tuak tu suah tumu abis pengudah iya ditemu viral ba facebook dua tiga hari tu,” ku iya nambah.

Ku Mummy Patz, iya deka ngaga chap kediri enggau sekelim tu dikena ngelaika sekelim iya enda sebaka enggau sekelim tuak orang bukai laban diatu tentu mayuh orang deka ngaga sekelim tuak pengudah sekelim iya nya viral.

MUNTANG DIGAGA…Mummy Patz mandangka sekelim tuak ke ditempa iya.

Suara Sarawak