SARATOK: Jalai empat arung Jalai Besai Pan Borneo ba Seksyen Spaoh (WPC05) enggau Sebangkoi (WPC06) dibuka Hari Satu tu.
Opis Kereja Raya (JKR) Sarawak ba sebengkah penerang madah, penguna jalai alun dipinta ngena pusin-P pengudah Jematan Awik ngambi tama ngagai Simpang Saratok.
“Nya kebuah, penguna jalai alun dipinta nitih pal tanda tatak laju 50 kilometer(km) sejam enggau 30 km sejam ba jalai pusin P nya enggau dua jalai arung pulai,” ku penerang.
Penerang nya madah, kunteriktor deka madah enti sema haribulan bisi berubah tauka sitak ti bisi bekaul jalai dibuka nya ila.
“Penguna jalai alun dilalau merambu pejalai ba sitak bekaul.
“Enti sema bisi sebarang kompelin bekaul pejalai trafik, kita tau telefon ngagai Opis JKR Sarawak Zon Selatan, Palan Jalai Besai Pan Borneo ba lumur, 082-619125 tauka Alexis (TMO Seksyen Spaoh) ba lumur, 019-8568569 enggau Bintang (TMO Seksyen Sebangkoi) ba lumur, 012-8801138,” ku penerang nya baru.
Nitihka penerang, jalai nya deka dibuka pukul 10 pagi, Hari Satu tu.
Berindik ari jalai renggat kepenudi agi dipejalai, penguna jalai alun dipinta meri kerejasama penuh maya betengahka jalai nya.
