KUCHNG: Sekula menua pesisir lebih agi sekula primari ba nengeri tu patut dikemerat dulu nerima agih bantu, ku Gerald Rentap Jabu.
Adun Layar nya madah tu dikena nentuka nembiak ba sekula nya enda tinggal pelajar lalu pengajar mega disikap enggau kereban ngajar ke menyana sebaka enggau ba mengeri.
“Perintah Besai patut ngungkupka belanja ngagai perintah nengeri nitihka pematut,” ku iya maya dirandau kemari.
Kenu ku Rentap, bisi tujuh sekula primari kurang nembiak ba sitak iya, baka SK St Peter, St Paul, SK St Bartholomew, SK St Mark, SK Pasa, SK Nanga Spak, SK Nanga Lawih enggau SK Saka.
Nya alai, ku iya sekula tu ukai semina kurang nerima belanja yang mega suntuk belanja dikena ngemanahka sekula.
“Penanggul tu mayuh ditapi sekula mubaligh ngujungka chukup jauh bida entara sekula tu enggau sekula ba mengeri,” ku iya.
Berebak enggau nya, dikena nentuka nembiak ba sitak iya enda tinggal ba pengawa pelajar sekumbang sekula ditutup, Rentap madah Komuniti Pemansang Pelajar Layar ke udah ditumbuh udah berundingka inisiatif meri bup latih ngagai bala nembiak.
“Tu endnag sebengkah ari chara dikena nyendiaka kereban belajar ngagai bala nembiak primari empat ngagai enam enggau nembiak ti deka napi peresa Setipikit Pelajar Malaysia (SPM) ungkup sekula ba Dun Layar.
