Taja pekara tu dikuasa Perintah Besai tang Perintah Nengeri sanggup nanggung ke pemaik anak Sarawak
“Pemadu baru, bisi dua buah sekula benung digaga baru iya nya SK Ulu Segan Bintulu enggau SK Meludam Betong ke beungkus lebih RM65 juta.”
KUCHING: Perintah Sarawak naka ulih mutar penanggul sekula repuk di Sarawak.
Menteri Muda Pelajar enggau Pansik Teknologi Dr Annuar Rapaee madah, projek bekaul enggau pelajar baka ngemanah enggau ngaga baru sekula baru ditanggung penuh Perintah Sarawak taja pekara pelajar kebendar dibaruh kuasa Perintah Besai.
“Pemadu baru, bisi dua buah sekula benung digaga baru iya nya SK Ulu Segan Bintulu enggau SK Meludam Betong ke beungkus lebih RM65 juta.
“Kelimpah nya, nengah ‘Rural Transformation Innesiatif’ iya nya berengkah ari taun 2018-2020 udah mungkur 63 buah sekula enggau penyampau nya lebih kurang RM20 juta.
“Enda kurang 90 buah sekula bulih pemaik nengah ‘Chief Minister Special Development Allocation’ (STAA) ke bepenyampau urung RM120 juta,” ku iya maya nyaut tanya ari Paulus Palu Gumbang (Batu Danau-PBB), Fazzruddin Abdul Rahman (Tupong-PBB), Miro Simuh (Serembu-PBB) enggau Abdul Yakub Arbi (Balingian-PBB) di Dun Sarawak, kemari.
Annuar mega madah Perintah Besai semina meri belanja RM100 juta ungkup pekara pelajar di Sarawak, tang kebendar penyampau ke diguna udah ngelui ari pemeri agih belanja nya.
“Ngemanah tauka ngaga baru sekula benung dipejalai tauka deka dipejalai udah meri pemaik ngagai lebih 100 buah sekula di Sarawak.
“Penyampau belanja ke diguna ke disebut aku bedau nyengkaum perengka guna bukai baka masang sambung karan ke beungkus RM50 juta,” ku iya.
Kenu ku iya mega, Perintah Sarawak udah sedia meri jali RM1 bilion ngagai Perintah Besai nengah kontra bayar ungkup ngemanah enggau ngaga baru sekula repuk di Sarawak.
Tuju deka meri jali nya dikena ngelengkas pemansang enggau ngemanah sekula ke patut.
Tang, Perintah Besai ngubah runding iya nya enda setuju enggau jali nya diberi chara kontra bayar utang Sarawak.
Isu tu agi diperunding enggau Perintah Besai lalu kami ngarap ulih nyapai pemutus ke manah enda lama agi.
