Semaya bantu atap dikeamat Gira

SELANGAU: Kaban Kunsil Nengeri (Adun) Tamin Ir Christopher Gira Sambang udah ngamatka semaya iya deka nyaup meri atap ngagai peranak Rumah Bala di Sungai Buloh, Selangau.

Gira besemaya lebuh peranak rumah panjai 40 pintu nya baru ngentak suba.

Iya nyaup 960 kepin atap beungkus RM109,000 diberi nengah agih Projek Berumah Rayat Seranta ari Projek Mit Menua Pesisir (MRP) Kunsil Nengeri (Dun) Tamin.

“Lebuh sida ngentak suba, aku kala besemaya deka meri sida agih belanja dikena meli atap.

“Ngarapka bantu tu tau ngelempungka agi pengawa sida berumah baru,” ku iya madah kemari.

Peranak Rumah Bala sebedau tu kala dituntung penusah karam di darat.

Naka diatu sida serumah agi diau ba ensarau seraya nganti rumah baru tembu.

Sida serumah deka besaup nyanggit atap ti diberi Gira lalu dipelaba tembu kandang tiga bulan.

Sama datai nyempulang Gira iya nya Pemancha Mathew Ganggang enggau Penghulu Thomas Jawa.

TERIMA KASIH … Peranak Rumah Bala di Sungai Buloh, Selangau nerima bantu atap ari Gira, empai lama tu tadi.

Suara Sarawak