Semengat pulai ke Batang Mandai

Tusun kedua…

NAMPUNG kenang silik agi pasal Adat Pemati Iban Saribas ke dikeluar minggu dulu, graduet bidang Sains Sosial ari Universiti Malaysia Sabah (UMS), Nicholas J. Ugik serak tu mai kitai nyidi dunya dikumbai batang mandai, dunya sebayan.

Raban bansa Iban ba Sarawak kelebih agi ba Saribas endang arapka bisi dunya bukai pengudah kitai parai lalu nya kebuah, kitai suah meda sida ke udah parai tu disimpanka baya.

Pia mega, pejalai sida ke udah parai ngagai dunya nya deka disempulang sabak bebuah ngambika niang deka selamat datai ngagai dunya sebayan sereta enda limpang ke bukai.

PENGARAP LAMA

MAI BERITA TUSAH… Bunsu Bubut deka bebunyi enti bisi pemati semak rumah panjai kelimpah bunyi nya ukai manah didinga laban ngelaika bisi penusah nyadi.

Nitihka jerita tuai ku Nicholas, sida ngasaika dunya sebayan tu jauh bebida enggau dunya nyata, semua utai tunsang, ke alai enti ba dunya sebayan din malam, kitai ditu siang.

Nambahka nya, komuniti Iban mega arapka sida ke udah parai semina ulih bejaku nengah manang tauka ari mimpi.

Nya kebuah, bansa Iban arap amat ke mimpi enggau penti pemali dalam mimpi nya meseti dititih ba pengidup sida.

Lebuh nusui pasal adat Iban Saribas, suah kitai ninga dunya sebayan tu disebut ba Batang Mandai.

Enti ari penemu geografi, dunya sebayan tu bisi ba ulu Kalimantan, Indonesia enggau pekara tu engka bisi kaul enggau palan pengentap keterubah bansa Iban ba Kalimantan kelebih agi ba Batang Kapuas enggau Batang Merakai.

Udah nya, komuniti Iban lalu mindah ngagai kandang menua bukai ba Sarawak lalu ngentak rumah baru sereta ngentapka diri ba kandang menua nya dataika seharitu.
Bisi mega orang madahka Batang Mandai tu nadai nanga enggau ulu, reti iya sungai tu nadai pengujung.

Ba kandang menua nya, bisi kelang nyabung manuk endur bala mensia ari rumah panjai ba dunya sebayan iya nya Panggau Libau Giau Takang Isang, Panggau Lendat Betungkatka Dan Sabang.

Jerita lama Iban baka sida Keling, Bungai Nuing, Sempurai, Pungga enggau Laja udah ngelawa kelang nyabung manuk nya.

Bisi mega cherita pasal tangga Bejie ke runtuh pengudah puntan dikena nikika langit ke bisi ba Sungai Mandai enggau telaga Kumang dikumbai bisi ba Sungai Mandai enggau mega Bukit Penguji, bukit bebatu ti renjan enggau lichau dia.

BUKIT TILUNG

TANDA BASA… Bansa Dayak Orung Da’an benung mensiang pendam lalu pengawa tu endang dikereja ninting taun ngambika pendam nya enda repa.

Ba tuchung Bukit Penguji tu bisi buluh pengerindu ti suah ditapatka semua mensia arapka jayau ngambi ulih narit ati orang ti dikerindu sida.

Ngelansa pasal Batang Mandai tu, enda ulih tama sengapa laban bisi pengibun ke alai semengat tu bansa Dayak Orung Da’an aja ke nemu.

Nya kebuah, kitai dulu nengah Bukit Tilung diuan raban bansa Dayak Orung Da’an lalu raban bansa tu madahka Bukit Tulung ba Kalimantan Barat nya dikumbai Bukit Kudus Dayak Orung Da’an.

Baka pengarap raban bansa bukai di dunya, Dayak Orung Da’an diau mendam ba Kalimantan Barat, Indonesia pechayaka pengudah mati, semengat siku-siku mensia deka begelumu ba Bukit Tilung.

Lebuh nimpai Bukit Tilung ari jauh, dia kitai meda bukit nya baka larung kelimpah jerita iya mai reti bukit nya endur pengidup bukai ke udah parai enggau matak temuai bukai ngagai Kalimantan Barat kelebih agi peranak ari Malaysia enggau Sarawak empu, ukai semina deka nemu jerita pasal Bukit Tilung aja, tang sida deka meda tauka nujah bukit nya empu.

ANDAU TITI RAWAN

GAYA PENGIDUP…. Rumah panjai raban bansa Dayak Orung Da’an di Kapuas Hulu.

Bansa Iban mega arapka dunya sebayan tu nyelai amat enggau bisi sebaka enggau gaya pengidup ba dunya nyata baka rumah panjai enggau utai dikereja sida besehari-sehari.

Tukang sabak suah nyebut niang deka mansa siti andau mit dikumbai Andau Titi Rawan ba leka sabak sida ke alai andau nya mit enggau alus amat lalu tau disema mit baka ubung.

Semengat sida ke parai nya deka bejalai belubah niti andau mesai lambar ubung nya tadi nangika labuh ngagai sungai ti chelum enggau bebuli.

Nitihka pengarap lama, semengat sida ke puntan niti andau Titi Rawan enggau labuh ngagai bebuli ai nya tadi deka pulai lalu dipechaya semengat sida tu deka idup baru.

Udah nengah andau nya, sida deka datai ba pendai nunjukka tebing sungai nyadi palan penyangkai perau, mandi, bebasu enggau ngambi ai.

Jerita lama mega madah, mayuh perau dipeda enda ngira sekalika perau besai tauka mit nunjukka mayuh semengat ba dunya sebayan ngena ngepan nyengkaum indu enggau lelaki seraya betabuh gaga ati lebuh ngambat penatai orang ke udah parai tama ngagai dunya baru nya.
Berebak enggau nya, sida ke udah parai enda dikelalu tama kita laban udah ngena pekayan pemadu manah enggau tampak gap. Enti nadai gap, sida deka ditulak ngagai sungai ba tisi pendai nya lalu semengat iya deka tegitang entara dunya sebayan enggau dunya nyata.

Nya kebuah, sida niang sebilik deka meri bangkai nya mandi enggau ngerasukka gari pemadu manah enggau gap dipeda ngarapka semengat diterima lebuh datai ba dunya sebayan.

Pengudah penatai niang diambat ba dunya baru nya, iya deka nengah siti endur ke baru iya nya ba endur ke rapas dipeda mata lalu maya nya, niang bisi ninga bunyi utai lebuh iya bejalai lalu bunyi nya nyawa bala kaban belayan ti beraie ngenang tudah udah nadai ba dunya tu.

MENUA INDAI LIPAI

NGERATAN JEMAN … Nicholas J. Ugik

Udah nya, niang deka mansa siti endur ti nanam bemacham bansa buah ti bekulit lalu lebuh iya ngambi buah nya, nadai isi dalam buah nya lebuh ngupak kulit iya tang niang enda sedarka diri udah ba dunya sebayan.

Niang neruska pejalai diri laban agi ngiga endur ti deka dituju iya lalu tukang sabak deka nyadaka leka sabak bebuah ngambi ngembing pejalai niang selamat datai ba endur ti dituju iya.

Pengelama bejalai, niang datai ba endur ke baru sereta dipeda gaga enggau lantang sereta endur nya bisi diuan nembiak mit ti benung rindang bemain.

Dia iya deka tepedaka siku indu benung nyaga anak mit benama Indai Lipai ba dalam cherita asal bansa Iban.

Ba adat bansa Iban, anak mit ti udah nadai dalam kandung, maya ada enggau sebedau tumbuh ngeli keterubah (parai lulus) nadai disengaie baka adat pemati baka selama.

Anak mit ke udah nadai tu deka dibalut sida sebilik ngena kain enggau disediaka siti pinggai ngambi ngelindung semengat anak mit nya.

Berindik ari nya, anak mit tu deka dianjung ngagai pendam ke enda sebaka enggau pendam orang bukai tauka dikumbai pendam nadai betanda. Semengat anak mit deka diibun Indai Lipai, siku pengibun anak mit ba dunya sebayan.

Niang deka neruska pejalai laban apin tetemuka endur ke dikedeka iya lalu datai ba tebing sungai mit bisi sebuah rumah enggau niang deka ngetu meda gaya rumah nya.

BUNSU BUBUT

Ba leka sabak, rumah nya diuan Bunsu Bubut, iya nya bansa burung ti deka bebunyi enti bisi pemati semak rumah panjai kelimpah bunyi ukai mai berita manah laban bisi penusah berat nyadi.

Ungkup penerang semua, bunsu tu mai reti ketuai bansa jelu enggau bansa Iban arapka bunsu tu ulih bebali nyadi mensia enggau bubut nya sebansa burung tauka nama saintifik iya dikumbai Centropus Sinensis ti mai indu utai.

Antu Bubut berumah enda jauh ari Pintu Tanah ti dipansa semengat orang mati ngagai Sebayan. Rumah iya jai amai, cherida pendiau laban penuh bemacham tai.

Ketegal tu meh enti kitai meda rumah kamah nadai ditipan, nadai disapu, rumah nya dikumbai kitai baka rumah Bunsu Bubut. Enti kitai ninga burung bubut memunyi, reti nya bisi orang parai di menua kitai tauka enda jauh ari menua kitai.

Dia niang meda rumah Bunsu Bubut ti bau, kamah ngujungka niang nulak tama ngagai rumah nya lebuh Bunsu Bubut ngasuh iya ngetu enda lama ba rumah nya tang niang neruska pejalai meraka sungai mit nya ngagai dunya sebayan.

Taja pia, enti niang setuju ngetu enda lama ba rumah Bunsu Bubut, semengat iya deka pulai baru ti agi disabakka kaban belayan iya ba dunya nyata.

DIAMBAT BA PINTU SEBAYAN

Ba dunya sebayan, semengat nya deka tetemuka sebuah rumah panjai ti besai enggau manah dipeda seraya ba pintu penama rumah panjai nya.

Peranak rumah panjai nya udah sedia ngambat penatai niang enggau ngerasuk ngepan asal Iban sereta betabuh ngena kereban muzik asal bansa kitai.

Nitihka jerita, Ketuai Sebayan deka berati kebuah pemati niang lalu enti sema iya mati ketegal munuh diri, semengat iya deka diasuh diau ba baruh rumah panjai laban munuh diri nya ukai pemati ke manah ba adat bansa Iban.

Semengat ti diteju diau di baruh rumah panjai nya suah rerauh enggau manjung ketegal minta dilepas laban ngasaika diri enda lantang diau di baruh rumah nya.

Enti iya parai manah, semengat nya deka diterima tama ngagai rumah panjai enggau sida sebilik ke udah parai dulu deka ngambat penatai sida kelai udah enggau sida ba dunya sebayan.

NGULIT

Tang pejalai niang ukai abis naka nya aja. Pengawa ngulit deka dipejalai sida sebilik, kaban belayan enggau sida serumah ti diau ba dunya nyata lalu sida deka ngulit pengelama tiga bulan laban semengat niang agi ayan entara dunya nyata enggau dunya sebayan.

Ba tiga hari keterubah pengudah nguburka niang iya nya mua ke lemai, sida sebilik enggau sida serumah deka ngagai siti endur ba tebing sungai ngambi nganjung pemakai enggau nungkunka api laban semengat ari dunya sebayan deka datai ngambi pemakai ti disedia.

Nitihka pengarap lama, seraban semengat ari dunya sebayan deka datai ngena perau ke manah lalu sangkai ba jelatung rumah panjai endur bisi pemati.

Pengudah ari makin lemai enggau petang, peranak rumah panjai deka berumban pulai ke rumah ngambi nyeliahka semengat sida ti agi idup begulai enggau semengat ke ba sebayan ba endur tungkun api nya.

Maya malam ba dunya nyata, sida sebilik, kaban belayan enggau sida serumah deka begempuru ba rumah niang ngambi ngibun sida sebilik awakka sida enda kelalu beraie ngenang penusah ti nuntung sida sebilik.

Sida niang sebilik deka ngenahka ai irup enggau pemakai ngagai bala bukai ba ruai pengelama tiga hari bejurut pengudah nguburka niang tauka dikumbai kitai pengawa makai pana.

Sepanjai timpuh ngulit, ruai enggau bilik meseti ditungkun dian tauka api kelita lalu ngenahka pemakai ngagai niang laban sida arapka semengat niang agi ayan enggau ngabas endur iya diau ba dunya nyata tu.

Nambahka nya, niang enda nemu diri udah nadai nyentuk pengawa ngetas ulit dipejalai pengudah tiga bulan sida sebilik ngulit lalu dikena ngemujurka pengawa ngetas ulit nya, pala munsuh deka digiga ungkup pengawa nya.

NGETAS ULIT

Iban ari Saribas suah ngayau anak ngagai palan diaku nyadi palan munsuh ngambi ngulihka pala munsuh lalu maya pemerintah Rajah Brooke kedua iya nya Chalres Johnson Brooke, pengawa bedengahka pala munsuh udah ditagang enggau enda tau dikereja bansa kitai Iban agi.

Nya kebuah, pengawa ngena pala munsuh nyadi genselan tu udah diubah ke alai kitai diatu suah ngena jani nyadika genselan.

Udah nya, pengawa ngetas ulit deka diketuai manang ngambi madahka niang iya ukai diempu dunya tu agi lalu patut pulai ngagai dunya sebayan ngambi semengat iya badu ayan enggau ngeregau bala bukai ba dunya nyata tu.

Kelimpah ari nya, balu niang deka ngambi entabalu ti dikereja manang lalu bejalaika adat beserara bungai kelai niang deka beserara enggau sida ke agi idup selama iya.

Jerita tuai mega kala madah, pengudah semengat udah parai tujuh kali ba dunya sebayan, Petara Sempulang Gana deka nukar semengat nya bebali nyadi ambun enggau embun nya deka lekat ab tubuh indu ti benung betubuh bisi.

Nya kebuah, semengat nya deka diadaka baru ngagai dunya nyata pengudah nengah pejalai ke jauh enggau lama ba dunya sebayan.

DUNYA PEMATI

Kelimpah ari nya, pengidup kitai ba dunya tu enda lama aja sebedau kitai tama ngagai dunya sebayan lalu sida ke idup udah tentu deka mati lebuh udah datai maya iya.

Taja ngembuan mayuh penemu enggau peragam ti bebida sentang dunya pengudah mati nya, tang semua kitai pechayaka bisi pengidup bukai pengudah kitai parai ba dunya tu.

Tang penemu kitai sentang pengidup pengudah parai ba dunya tu bisi bida entara adat enggau pengarap di dunya tu.

Ambika banding, pengarap Kristian enggau Islam arapka semengat ke udah diau ba dunya sebayan deka angkat baru lebuh Hari Ngakim nentuka semengat nya tama ngagai neraka tauka diterima ba serega.

Ba jeman moden tu, adat lama bansa Iban majak lenyau ketegal singkang pemansang dunya enggau ubah pengarap baka pengarap Kristian di menua tu.

Nya alai, dikearap ubah pemansang dunya ti majak moden tu enda ngasuh adat lama kitai makin lenyau lalu rebak biak ulih ngetan sereta nyaga penatai asal bansa kitai taja enda dikereja baka pengarap lama nya.