Semilan nembiak nyauka bebadi nyawa

KUCHING: Semilan nembiak Sekula Primari Bansa China (C) Chung Hua Stapok bakal lalu siku ari sida patah jari kiba pengudah van ditepan sida dilantak ba penusah bebadi jalai alun, ditu kemari.

Penusah diripot nyadi urung pukul 6.10 pagi ba mua kilang Paragong, Batu Kawa.

Ketuai Opis Pansik enggau Penerit Adat Trafik Sarawak, Superintendan Alexson Naga Chabu madah, penusah tu bepun ari sebuah kerita Perodua Myvi ti dikena siku nembiak lelaki beumur 19 taun telajak lalu ngelantak belakang van ti ditepan bala nembiak enggau siku deriba indu beumur 62 taun.

“Deriba enda tetagangka van nya lalu ngelantak selapat jalai sereta tepawah ke jalai sepiak ngujungka iya ngelantak dua buah kerita bukai ba jalai nya sebedau tepawah ke sepiak kanan jalai,” ku Alexson nerang silik.

Alexson madah, semua nembiak ti bakal udah ditaban ngagai Sepital Besai Sarawak (HUS) nerima perubat.

Deriba kerita ti ngelantak van semina bakal seraya deriba van enggau dua buah kerita bukai nadai bakal.

Ku Alexson, kes tu agi dipansik di baruh Seksyen 43(1) Akta Pengangkutan Jalan 1987.

ENDA NGADANG… Empat buah entukar belantak ba mua kilang Paragon.

Suara Sarawak