SIBU: Bisi semilan peranak karam ba darat pengudah dua buah rumah di Jalai Kapor, Bukit Lima angus lengis, tumu pagi tadi.
Tuai Opis Bomba enggau Penyah Penusah Malaysia (JBPM) Zon 4 Sibu, PgKB I Andy Alie ba sebengkah penerang madah, sida nerima kangau ngenyit bekaul penusah tu pukul 2.42 pagi.
Berindik ari nya, ku iya, bisi 21 raban bomba ari Balai Bomba enggau Penyah Penusah (BBP) Sibu Sentral enggau BBP Sungai Merah ke mega balai bantu betuai ke iya empu udah berumban ngesah penusah penyauh empat kilometer ari balai nya.
“Penusah angus tu mungkur dua buah rumah pemesai 30×20 kaki udah angus 100 peratus.
“Lebuh ngerara api, kami napi penanggul suntuk ai laban nadai paip bomba semak endur penusah nya nyadi,” terang iya.
Nya kebuah ku Andy, raban operasyen udah mai tiga hos ngambi narit ai ari parit besemak.
Ku iya, raban operasyen mega ngaga ‘FireBreak’ dikena nyeliahka api ari nyerarai ngagai rumah ketiga lalu ngerara penusah angus nya ngena chara ‘offensive’ enggau ‘defensive’.
“Pengudah penusah angus ulih dipadam pukul 3.15 pagi, sida udah matau endur nya nentuka api udah dipadam lengis.
“Pukul 4.15 pagi, operasyen ngerara api ba dua buah rumah nya dikenuku tembu,” terang iya baru.
Andy madah, nadai penusah bakal tauka bebadi nyawa dirikodka ketegal penusah rumah angus nya lalu pun penyadi sereta penyampau pengerugi agi dipansik Unit Pansik Penusah Angus JBPM Zon 4 Sibu.
