BETONG: Pelajar beguna amat dikena nempa modal mensia ti menyana ba pengidup nadai ngira pengawa dikereja sida, ku Kaban Parlimen Betong, Dr Richard Rapu.
Iya madah, pekara nya nyadi tikit dikena ngangkat tikas pengidup enggau penatai pemisi ruang bilik sida empu.
“Nya alai, kitai apai indai meseti nentu bala anak bulih pelajar ti menyana ungkup tunga kuing sida ti tampak jemah.
“Enti sida mujur ba pelajar, nya ukai semina nyamin tunga kuing sida jemah tang nempa ulah ti manah ngagai bala anak,” ku iya.
Dr Richard mansutka jaku nya rambau bejaku ba Pengerami Makai Lemai Gerempung Apai Indai enggau Pengajar (PIBG) sereta Komuniti Lokal (PIBGKS) Sekula Primari (SK) St Peter enggau St Paul empai lama.
Ba lansa sebaka, iya ngelalau apai indai nganjung bala anak sida bemalam ba buding laban fasiliti ti meruan enggau likun bisi disedia ba sekula.
“Berebak enggau nya, bala anak deka muntang agi nitih aktiviti ti diatur ba sekula kelimpah sida ulih meri perati penuh ngagai pelajar laban langgur pengawa belajar ba sekula diatur meruan.
“Ukai naka nya aja, pekara nya ulih nyeliah bala nembiak enda nurun ke sekula sereta meri pemaik ngagai apai indai enda kiruh beranjungka bala anak ninting hari,” terang iya.
Ba pengerami nya, Dr Richard bisi meri agih belanja RM5,000 ngagai raban PIBG SK St Peter enggau St Paul dikena kededua sekula nya bejalaika aktiviti sida.
