Semina tiga piket minyak makai sekali meli

KUCHING: Opis Menteri Dagang Dalam Menua enggau Pekara Penguna (KPDNHEP) ngemendarka bala pedagang kedai renchit natak penguna meli minyak makai pikit 1 kilogram (kg) bepun 19 Januari tu tadi.
Menteri iya, Datuk Seri Alexander Nanta Linggi madahka sekat tu semina ngemendarka tiap iku penguna meli tiga pikit minyak makai 1 kg ungkup tiap transaksyen.
“Pekara tu digaga ngambika mayuh agi penguna ulih teulihka bekal minyak makai besubsidi ba makit.
“Kebuah pia, semina minyak makai dalam kerubung polibeg 1 kg aja barang dijaga subsidi perintah ke dijual ngena rega RM2.50,” ku iya bejaku ngagai pemberita pengudah ngelawa kilang mungkus minyak makai di Kuala Lumpur, kemari.
Ku iya, KPDNHEP seruran matau sereta meresa rega minyak makai dalam nentuka minyak makai di selampur menua dijual nitihka rega ti patut.
Iya ti mega Kaban Parlimen Kapit ngingatka raban penguna pasal dua bansa minyak makai ti dijual ba pasar iya nya minyak makai besubsidi dalam bungkus polibeg 1 kg enggau minyak makai nadai besubsidi ke dijual dalam butul 2 kg, 3 kg, 5 kg enggau ke bukai.
“Penguna ti milih minyak makai 2 kg ke atas, sida ulih ngena aplikasyen Price Catcher ungkup manding rega minyak makai ba palan bebeli barang ti besemak.
“Lalu enti bisi penjual ti nyual minyak makai besubsidi ngelui ari rega ti udah ditetapka tauka nyual minyak makai 1 kg belalai ngagai menua luar nengah garis entara, anang laun ngaga ripot ngagai KPDNHEP,” ku iya.
Iya mega ngelalau mensia mayuh ngambika enda ibuh begau meli barang tauka meli barang kelalu mayuh awakka bekal minyak makai cukup ungkup semua orang.

Suara Sarawak