KUCHING: Semua pengempu enggau pemekal entukar elektrik (EV) di Sarawak dilalau nentu lumur rejister ngasi ke spesifikasyen ePlate ti ditetap Opis Pengangkut Jalai (JPJ) taja pen polisi nya apin diterit naka diatu.
Menteri Pengangkut, Datuk Seri Lee Kim Shin madah, pekara nya beguna amat taja pen polisi ePlate nya siti ari inisiatif renggat Perintah Besai lalu pengawa nerit polisi tu agi ba renggat volunteer.
Iya madah, nya berebak ari siti kes empai lama ti ngaul siku pengempu EV ti nerima notis ari JPJ bekaul penyalah enda ngasi ke spesifikasyen ePlate kelimpah nyungkak ngagai penyarut runding enggau pengirau mensia mayuh.
“Kitai ngaku inisiatif raban JPJ ti mansik kes tu sereta meri penerang lengkas taja pen ba naka diatu pengawa nerit ke atur tu agi ba renggat ngelalau enggau nadai kompaun.
“Kes tu mandang pemesai guna pengeleda enggau pemereti ati mensia mayuh pasal pengawa nerit polisi baru baka ePlate,” ku iya ba sebengkah penerang kemari.
Bepelasarka penerang ari JPJ Sarawak, notis nya dikeluar nyadi sebagi ari pelasar nerit atur ngena chara meri lalau.
Pengempu entukar nya ngaga ripot rasmi lalu asil pansik tetemu ke lumur plat diguna iya nitih ke spesifikasyen ti dikemendar.
Kes nya ditutup enggau nadai atur bukai pengudah nya.
