SIBU: Ketegal ngira pengelikun, nangika pengerekai Covid-19, Tuai Rumah Sijah Ejut, nguji ngaga sengkabung mua ngambika bisi dikena sida sebilik.
Tambah mega, kedai tauka farmasi ke bisi ba Sibu suah madahka sida abis bekal sengkabung mua ti beguna amat jam diatu.
Berindik ari nya, ngena penau enggau pengelandik bejait iya iya berengkah ngaga sengkabung mua ungkup sida sebilik aja.
Taja pia, Sijah nadai ngadang pengawa diri nyau ditemu bala mayuh pengudah dikunsi ba laman media rama, FaceBook (FB).
NERIMA MAYUH PEMINTA
Ari nya, iya belabuh ngaga mayuh agi sengkabung mua laban peminta majak nambah ninting hari.
“Endang keterubah suba aku ngaga dikena kami sebilik aja.
“Tang enda ngadang udah aku ngayanka pengawa aku nya ba FB bala ke besemak nyau minta aku ngaga ke sida.
“Diatu aku ngaga sengkabung mua nitihka peminta sida ke deka meli,” pia ku iya maya berandau enggau pengarang berita, kemari.
Sijah madah, nyentuk diatu iya udah ngaga lebih 100 iti sengkabung mua nya nyengkaum ngaga ke sida ari menua bukai baka di Kuching enggau Bintulu.
“Taja pia sida ti ngambi ke rumah kitu endang nitihka Atur Nagang Pejalai (PKP). Sida ngambi ba mua rumah aja,” ku iya madah baru.
Ke bendar ku Sijah, iya udah ngaga sengkabung mua nya berengkah 16 Mach suba tang sepengudah PKP dipejalai kena 18 Mach, iya mupuk ngaga mayuh agi laban ngadang engka sengkabung mua nya majak mimit dijual ba pasar.
ULIH DIKENA BARU
Ngenang pasal rega ku Sijah, siti sengkabung mua orang besai tuai berega RM10 lalu ungkup anak mit RM8 siti.
“Sengkabung mua tu ulih dibasu sebedau tau dikena baru.
“Enda baka ke dijual ba pasar, sengkabung tu ulih dikena baru enti udah dibasu.
“Nyangka ketegal nya, bala kaban sereta bala ke bukai majak nambah udar sida ngasuh aku ngaga mayuh agi,” ku iya madah.
Taja pia, ku iya, iya bisi napi penanggul suntuk kereban dikena ngaga laban diatu kedai mayuh enda dibuka.
Tang seninjik bendar iya madah, di rumah iya agi mayuh kain enggau ‘span’ ti dikena ngaga laban iya endang bisi kedai nyual asil pengelandik jari ba Sibu sebedau ditutup enda lama ketegal PKP.
“Kelimpah ari nya, bisi mega kedai kain di Sibu ditu dibuka enda lama alai aku ngena awak nya bebelika utai ke dikena.
“Nya alai, diatu aku tebal agi semina ngandalka perengka ke bisi dikembuan aku di rumah ditu aja,” ku iya madah nyemetak.
Sijah madah, dalam sehari iya ulih ngaga urung 20 ngagai 25 iti pemadu mayuh.
Ku iya, chara ngaga nya mega bisi beleman alai iya enda ulih kelalu berumban sereta nitihka chara guna sengkabung mua ke bendar.
“Aku nadai orang nyaup nya alai bisi lubah mimit ngaga. Tambah mega sengkabung mua tu meseti digaga nitihka guna iya ke bendar. Enda sepeneka ngaga.
“Ari nya aku semina ulih ngaga dalam 20 ngagai 25 iti aja sehari,” ku iya madah.
UDAR TUMU
Berindik ari nya, ku Sijah, mensia mayuh ti deka meli ari iya meseti madah tumu bepun ari peminta endang majak nambah mayuh ninting hari.
“Naka diatu sida ke meli endang madah dulu lalu sida deka ngambi hari siti enti sengkabung mua udah tembu digaga.
“Enti madah tumu aku ulih ngaga sebedau sida datai kitu hari siti tang enti enda baka nya dia sida deka nganti dulu.
“Pia mega bisi enda ulih ngambi maya ke udah tembu dia sida ke dudi agi deka ngambi nya ketegal peminta mayuh,” pia ku iya madah.
Mensia mayuh lebih agi ba sebelah Sibu tauka sida ari luar ti bisi deka meli ari iya tau betanya ngagai lumur iya empu, 013-571 0373.
