KUALA LUMPUR: Perintah setuju nurunka rega sengkabung mua tiga serak ngagai RM1 siti, ku Menteri Dagang Dalam Menua enggau Pekara Penguna (KPDNHEP) Datuk Alexander Nanta Linggi.
Nanta madah, opis menteri iya sedia nurunka agi rega sengkabung mua dikena ngelempungka tating belanja mensia mayuh berindik ari atur diteritka perintah ti enda tau enda ngena sengkabung mua bepun 1 Ogos tu tadi.
“Rega sengkabung mua diturun ngagai RM1 siti ba rega renchit. Reti iya, rega ngangkat sengkabung mua iya nya 95 sen.
“Pekara tu dikearap ulih ngelempungka tating belanja mensia mayuh kelebih agi apai indai ti bebelika sengkabung mua ungkup anak sida.
“Opis menteri mega sedia nurunka agi rega sengkabung mua enti bisi peminta enggau nitihka pematut,” ku iya.
Nanta mansutka jaku nya lebuh nyaut tanya Kaban Parlimen Stampin Chong Chieng Jen enggau Kaban Parlimen Rasah Cha Kee Chin ba Aum Kedua, Penggal Ketiga Parlimen Keempat Belas di Putrajaya, ditu tadi.
Nambahka nya, piak sida deka beratika baru pekara bekaul nentuka pengelantang rayat semampai diintu meruan.
