KUCHING: Seni asal Iban ukai semina pesaka jeman kelia aja, tang nyadi legasi idup komuniti ti patut ditan sereta ditampung ngagai rebak dudi hari.
Chairperson Iban Women Charitable Trust (IWCT), Tan Sri Empiang Jabu madah, penyulur legasi tu beguna ngagai komuniti ngambi sida meruan ingatka seni asal diri ti nyadi sebagi ari semangat enggau identiti komuniti.
“Pesaka asal kitai enda tau enda terus idup sereta nyadi kelai identiti bansa kitai.
“Pesaka tu patut meruan tumbuh sereta dikemerat lalu ditan ungkup rebak dudi ila,” ku iya.
Empiang bejaku munyi nya rambau Pengerami Nyua Perais Pekit Pengelandik Jari IWCT 2025/2026 ba siti hotel ditu, empai lama.
Ngenang sekeda chunto bekaul genteran jaku Nyabur Indu enggau Nyabur Lelaki ti ngasuh mayuh orang saru penemu ari sukut reti jaku nya kebendar, iya ngarap ke pekara tu terus ditegi enggau diterang sereta dibantaika ngagai mensia mayuh.
“Mayuh orang saru penemu ba nama Nyabur Indu, Nyabur Lelaki enggau Langgai Tinggang.
“Duku besai bendar guna, besai bendar reti, lalu penama duku tu nitih gaya mata ti digaga tukang kambuh,” terang iya.
Ku Empiang, pengawa ngetanka pesaka asal meseti diteruska nengah pengawa ngasilka asil pengelandik jari asal baka nganyam tikai bemban bebuah, duku, ilang, Pua Kumbu, tanggu enggau ke bukai.
Iya nangkan nya mega meransang mensia mayuh ti deka ngelala jalai pengidup komuniti Iban nengah pengawa pemandang ti diatur, ti ngayanka pemanah budaya sereta tengkebang pesaka asal Iban.
Iya nangkan nya ngarapka inisiatif nengah pekit pengelandik jari tu ukai semina terus dipejalaika jemah, tang mega deka ngerembai nyadi pelasar ti besai agi.
Ku iya, pengawa tu tau ngerembai sereta meri empas ngagai mayuh agi orang tu betenun, orang ti rinduka asil pengelandik jari enggau orang ti nyaga legasi nya di serata pelilih menua tu.
“Raban nembiak ngembuan pangku pengawa ti beguna amat laban sida ukai semina nyadi tuai jemah ila, tang mega nyadi pelindung enggau penyaga identiti komuniti kemaya hari tu.
“Kitai begunaka sida bejalai enggau kitai, mai penemu tu ngagai jemah ila sereta ngena pelasar moden, teknologi enggau bakat pelajar dikena nentuka budaya kitai seruran regas, pintar sereta relevan dalam dunya moden,” ku iya.
Tandu iya, penyereta raban nembiak ti chakah dalam pekit mega beguna dikena nentuka pengawa ngintu pesaka asal ti dipejalaika kemaya hari tu ulih dipajakka jemah ila.
Berebak enggau nya, Empiang ngarapka pengawa IWCT tu ulih matak pengerindu palan pelajar tinggi di serata menua Malaysia bekerejasama ngetan sereta ngenegapka pesaka asal pengelandik jari komuniti Iban.
Ku iya, IWCT sedia bekerejasama enggau raban nembiak ti bisi ati deka mantu ngaduka pengawa nya, seraya ngemeratka komuniti enda patut nganti nyentukka pengawa asal majak punas baru sedarka rega enggau pemesai guna iya.
Ku iya, IWCT mega bisi ati deka ngatur program baka nya baru dikena ngangkatka tikas kualiti asil pengelandik jari komuniti asal Iban, kelimpah ari meransang ngeluarka mayuh agi tuju komersial dikena nyungkak penatai pemisi komuniti di menua pesisir.
