KOTA SAMARAHAN: Seni ukai semina pemerindang tauka pengelandik nero enggau ngasilka siti seni aja tang nyadi siti pelasar komunikasyen ti ngasi ba pengawa ngenatai ekspresyen, buah runding enggau rega siti seni.
Dekan Fakulti Seni Guna enggau Kreatif (FSGK), Universiti Malaysia Sarawak (UNIMAS), Dr Louis Ringah Kanyan madah, seni ngesan pangku pengawa besai nyadi pelasar komunikasyen ti ulih ngenatai pesan ti enda ulih ditusui enggau jaku.
Iya madah, seni mega nyeremin buah runding, isi ati enggau semangat orang ti ngasilka seni nya empu.
“Seni iya nya siti ari komunikasyen enggau ekspresyen komunikasyen.
Nama kebuah komunikasyen?
“Ambi ke chunto, malam tu kitai deka ngatur Battle of The Band lalu bisi pengawa belagu.
“Penengkebang leka lagu nya ngenataika seni nengah lagu lalu leka lagu iya nya siti seni ngenataika pesan enggau komunikasyen nengah chara tulis,” terang iya.
Louis bejaku munyi nya lebuh bejadi Program Ruai FACA 2026 ti diatur di DeTAR, UNIMAS ditu.
Tampung iya, pengawa ngatur Ruai FACA ukai semina siti program pemerindang tang pelasar ngempuru elemen seni, budaya, kreativiti enggau semangat begulai ba raban UNIMAS.
Ngelansa pasal konsep ‘Ruai’, iya madah, nya ngelambang siti ruang tebuka dikena ngempung komuniti ungkup bekunsi buah runding, penau sereta rega budaya seriris enggau pangku pengawa fakulti nyadi pelasar integrasyen bemacham disiplin seni.
Program Ruai FACA 2026 dipasuk lebih 100 nembiak ti begulai ngemujur program nya kelimpah nyadi pelasar nempa profesionalisma, disiplin enggau penyikap graduet seni napi dunya kereja. – TVS
