SEPENYAMPAU 13 menua napat ke Tanah Kenyalang, singkang bala pelanda Silabur Ultra Trail (SUTra) 2026 ukai semina napat ke adan tang nyimpan kenang manis ba tengah pemanah rampa menua Gua Silabur.

Taja pen nujah pejalai ti jauh, nurun niki bukit, emperan ti lichin, tanah paya enggau gaya hari ti enda tentu tang sempun semangat bala penyereta tetap mau.

Ba sida, tetiap singkang, pengelelak enggau teterap nya nyadi kenang manis ti semina ulih diasai lebuh belanda ba genturung Gua Silabur.

SUTra 2026 ti diatur Alpha Sport Event nya mujur manggai edisyen keempat sereta nerima timbal ti chukup ngemantup ati ari bala penyereta.

Narit ati agi, urung 250 pelanda datai ari 13 menua nyengkaum Malaysia, Singapore, Filipina enggau Taiwan.

Bala penyereta besatup ba empat kategori besai iya nya 15 kilometer (km), 30 km, 50 km enggau 100 km.

Tetiap kategori nya nyendia pemar kediri empu ti ukai semina nguji pengering tubuh tang pengetan runding enggau pemerani penyereta terus belanda napat adan.

BISI PENGELAIN

Ba siku pelanda ari Mindanao, Filipina, Guia Angelie Cabigas, 32, pengawa iya masuk kategori indu 30 km mai reti kediri empu pengudah mujur dipadu nyadi champion ba kategori nya.

“Aku chukup gaga taja jalai ditujah kami ba kategori tu endang enchabar.

“Pelanda ari Malaysia chukup laju lalu nya kebuah aku naka ulih ngaga pemadu manah dikena ngulih gelar champion tu,” ku iya.

Guia bejaku munyi nya rambau dirandau pemberita pengudah Pengawa Nangguh SUTra 2026 ba Balai Mayuh Guna Kampung Batu Bedang ditu, empai lama.

Iya madah, nya mih kedua kali iya ngambi bagi ba program belanda nujah babas di Sarawak pengudah masuk kategori 100 km ba taun nyin kemari sereta mujur niki podium.

Peneleba keterubah nya meri empas ti besai ngagai iya nyentuk datai baru ke Sarawak ba program sekali tu sereta mai urung 45 nyentuk 50 bakih iya ari Filipina ti bela ngambi bagi ba program nya.

“Ba taun nyin kemari, bakih aku mai kami ngambi bagi ba Program Belanda Silabur laban nya pekit belanda siti bintang ba Asia Trail Master lalu aku masang juluk deka ngulih dua bintang.

“Lebuh pengawa rejister dibuka ungkup edisyen taun tu, aku mai bala bakih aku ngambi bagi ba program tu.

“Chukup muntang mai sida ngambi bagi ba program tu laban sida nerima timbal manah ari raban pengatur.

“Pia mega, kerejasama begulai endang tegap lalu nya kebuah semua pengawa kami ditu lanchar,” ku iya.

PEMATAK BESAI

Nerang silik, iya madah, pematak besai ba Sarawak ukai semina bepanggai ba penyelai babas ti enchabar tang penyiru peranak lokal sereta servis manah ari raban pengatur mujur matak mayuh penyereta ari menua luar.

“Sarawak ngembuan rampa menua ti chukup manah lalu peranak ditu chukup kemerah enggau siru.

“Raban pengatur program tu chukup kemerah sereta lengkas meri timbal ngagai tetiap tanya ari bala penyereta.

“Semua pengawa kami lanchar lalu aku deka mai mayuh agi pelanda ari Filipina datai kitu ba taun baru,” tampung iya.

Taja pen datai ari Filipina ti tebilang enggau pengangat gaya hari sereta jalai babas ti enchabar, Guia ngaku peneleba belanda di Sarawak tetap bebida.

“Gaya hari ditu angat agi tang pekara nya enda enchabar aku ngambi bagi ba program belanda tu,” ku iya.

PENELEBA BEREGA

Iya mega bela bekunsi peneleba ba taun nyin kemari ti ngajar iya bejimat agi lebuh nujah jalai ngagai genturung gua.

“Ba taun nyin kemari, lebuh aku nurun gua, aku teterap.

“Udah nya, aku nadai pilih bukai kelimpah bejalai aja ari kilometer 26 nyentuk datai ba adan 100 km.

“Nya alai, ba taun tu, aku udah mansik jalai ti deka ditujah enggau manah.

“Aku nemu dini patut belanda lalu dini patut bejimat,” terang iya.

Laban ngembuan peneleba belanda nujah babas kenyau ari empat taun ti udah sereta begelar siti bintang Grandmaster ba Asia Trail Master, Guia madah, lumba nya meri pengelantang kediri empu ngagai iya.

“Pengawa belanda nujah babas meri pengelantang kediri empu ngagai aku.

“Nengah program baka tu, aku betemu enggau mayuh bakih baru nyengkaum pekit belanda di Sarawak ba taun nyin kemari enggau taun u.

“Ba taun baru, aku ngarap ulih belanda baka bakih aku ti bukai ti regas belanda nujah babas,” ku iya betundi seraya madah ke iya merambu deka nikah.

MENGERI GASTRONOMI

Pengudah abis program nya, Guia enggau bala bakih iya merambu diau berapa hari di Sarawak ungkup nyepi penyamai pemakai lokal ti enda sempat diempa sida ba taun nyin kemari.

“Ba taun nyin kemari, kami nagang diri makai mayuh laban nyikap diri napi pekit belanda.

“Tang pengudah pekit belanda tu, kami deka diau berapa hari di Sarawak lalu tu mih peluang kami nguji penyamai pemakai ditu.

“Kami deka nguji penyamai Mi Kolo enggau Laksa Sarawak ti chukup tebilang ditu,” ku iya.

KENANG MANIS

Nangkan nya, pelanda Borneo ti ngari ke Sandakan, Sabah, Azmil Saripudin, 27, bela narit perati pengudah begelar champion ba kategori 100 km.

Ba Azmil, penyulut nya besai bendar reti laban SUTra nya mih keterubah iya masuk pekit belanda nujah babas ba luar Sabah.

“Aku empu pen enda nyangka diri tau ngempu gelar champion tang aku nyelinting datai ba adan ba timpuh 15 jam.

“Aku ngambi bagi ba SUTra tu laban deka ngulih peneleba belanda nujah babas ba menua orang.

“Sebedau tu, aku suah ngambi bagi ba pekit baka tu di Sabah lalu tu mih keterubah aku belanda ba luar Sabah,” terang iya.

Iya madah, peneleba belanda di Sarawak nyendia pengelain kediri empu kelebih agi ari sukut rampa menua, jalai ditujah enggau sukung ari peranak lokal sepanjai pekit nya diatur.

“Peneleba belanda di Sarawak chukup narit ati lalu nya bebida enggau peneleba aku sebedau tu.

“Jalai ti ditujah ditu chukup enchabar kelebih agi ba genturung ti lichin engka ketegal ujan tauka ribut.

“Bisi sekeda penyereta nyau teterap lalu bisi mega tesat.

“Aku ngasai engka ukai aku aja ti tesat, pelanda bukai pen engka sama baka aku,” ku iya.

Tang ba semua pemar nya, Azmil madah, sukung peranak lokal nyadi peneleba ti pemadu negu tangkai ati iya sepanjai SUTra nya.

“Pekara ti chukup narit ati iya nya pemanah rampa menua enggau ulah peranak ditu ti chukup kemerah.

“Sida chukup belepa sereta seruran meri sukung tegut ngagai kami.

“Genap kali aku belanda mansa genturung rumah, bisi aja peranak lokal meri sukung ngagai aku.

“Pekara tu mih ti mulai ke kenang aku ngagai Sabah laban ba din mega, komuniti bela meri sukung tegut ngagai bala pelanda,” tampung iya.

Azmil ngaku pengawa belanda nujah babas nya nyadi pengawa ti dikerindu ke iya kenyau ari mit.

Iya udah ngambi bagi ba bemacham program belanda kenyau ari taun 2000 tang tetap milih program belanda besai baka SUTra.

“Perambu enda mayuh, insya-Allah. Aku ngarap kediri empu majak ransing enggau konsisten belatih laban nya mih kunchi nuju penyulut tu,” ku iya.

NARIT ATI

Siku pelanda indu ari Sabah, Nurul Haayati Osman, 34, mujur mandang pengulih diri pengudah mujur datai ba adan ungkup kategori indu 100 km lalu ngempu penuduk ke-20.

Haayati madah, pengawa iya ngambi bagi ba SUTra nya nyadi peneleba keterubah iya belanda nujah babas di Sarawak.

Iya madah ke diri empu chukup tekait ati nimpai pemanah rampa menua sepanjai jalai ti ditujah ba Silabur dia.

“Jalai ditu chukup enchabar lalu enda sebaka enggau jalai di Sabah.

“Endi dibanding, jalai di Sabah enda tentu mayuh niki bukit tang jalai di Silabur enchabar agi,” terang iya.

Taja pen nujah jalai ti mar tang iya tetap nimpai pemanah rampa menua sepanjai jalai nya ti mai bala penyereta mansa sekeda genturung pendiau.

Tambah mega, utai ti ngasuh sida temegah iya nya penatai peranak ba genturung pendiau besemak nyengkaum nembiak mit ti sampal meri sukung ngasuh peneleba sekali tu majak besai reti.

“Mayuh nembiak mit datai meda kami belanda,” ku iya.

Ba bala penyereta, SUTra 2026 ukai semina siti program lumba ti nguji pengetan tubuh enggau ngulih penuduk aja tang nya siti program ti besai reti ngempung bala penyereta ari bemacham tirai juru enggau menua nengah semangat, kaul bebakih enggau penyiru ke rampa menua.

Ba genturung Gua Silabur, tetiap bekau kaki ti tinggal ba tanah lutak nyimpan cherita kediri empu pasal pemerani meraka adan, pengeliat ati nujah jalai babas ti mar enggau pengingat manis ti matak penyereta datai baru ke Tanah Kenyalang.