KOTA SAMARAHAN: Pekit Ratu Etnik Dayak Samarahan sempena Samarahan Food and Cultural Festival (SFCF) 2026 mujur diatur nengah pemujur Serenna Ellyshes Keli ti dipadu nyadi champion.
Pemanah gaya bejalai enggau pemintar udah narit ati bala akim ti mandangka pemajik gamal, pengandal sereta pemintar mereti ke pesaka budaya komuniti Dayak ngujungka iya mai pulai perais mata duit RM2,000 sereta setipikit.
Pia mega, penuduk kedua dipenggi Claudia Mai Ttindit ti bela nerima mata duit RM2,000 enggau setipikit seraya Phynterliana Agatha Lambeh Herryson bulih penuduk ketiga enggau mai pulai perais mata duit RM1,000 sereta setipikit.
Pekit ti keterubah diatur Majlis Perbandaran Kota Samarahan (MPKS) nengah kerejasama Gerempung Main Asal Dayak Sarawak (SDCA) nya ngempuru tujuh pemekit lalu nyadi pelasar mandang penyelai pekayan asal, seni budaya enggau pesaka asal komuniti Dayak ngagai mensia mayuh sereta bala pengusung ti bisi datai.
Pengawa nyua perais ngagai bala pemenang mujur dipenyadi Kaban Kunsil Nengeri (ADUN) Stakan Datuk Hamzah Brahim.
Bela datai, Chairman MPKS, Abang Ismawi Abang Ali, Pegawai Pelilih Samarahan, Ahmad Abdul Razak, Sekretari MPKS, Zuraida Idris, Sapit Chairman MPKS, Daily Joseph, Chairman Pengatur SFCF 2026, Profesor Madya Dr Sopian Bujang enggau Presiden SDCA, Bridgette Astra Donald. – EDISI UKAS
