Seribu Taun Agi: Lagu balada keterubah Sima Tawil

Sima Tawil, penanyi Iban tebilang enggau lagu Tesat Madang Bungai sereta lagu Kunsi Serikat bepadu nyawa begulai enggau Ricky L serak tu datai ayan baru enggau sebuah lagu rentak balada.
Lagu ke diberi nama Seribu Taun Agi tu dikeluarka Sima empu. Leka lagu tu ditengkebang Monica Elen iya nya siku komposer ke mega ari penanyi Iban ti kala nyadaka lagu Aku Bisi Nuan, Nadai Endur Mantah, Merinsa Beserara enggau mayuh agi ke bukai. Muzik lagu tu ditusun Hairee Francis lalu dirikod ba Francis Five Studio.
Tentu mayuh bala peminat ti rinduka sada nyawa Sima betanya nama reti sereta kisah dalam lagu tu? “Lama amat ga nganti sampai 1000 taun pia ku kedua.”
Nya alai, bepelasarka penerang ke dipansut ba laman akaun media rama Sima Tawil empu, dia iya madah kebendar buah penemu ngasilka lagu tu datai ari runding iya empu begulai enggau Monica.
Ku iya, lagu Seribu Taun Agi tu, ukai ungkup orang ke bepangan nanggam pengerindu aja tang lagu tu mungkur semua renggat.

Sima Tawil

“Ambika chunto, ngenang penyayau kitai ke diri sebilik, apai indai, penyayau ke laki tauka bini, diri menyadi, penyayau ke anak enggau semua kaban bakih enggau begulai kena bungkur magang.
“Lagu tu baka siti pengarap ati, empa penyayau ke pangan diri dia kitai ngandalka diri enti ulih begulai lama agi nyentuk ngagai 1000 taun agi.
“Pia mega, kebendar penyayau enggau pengasih sigi enda nemu berubah, enda nemu lenyau taja pan 1000 taun agi ti deka datai, nyema kitai udah ngembuat ati ti udah bebalut enggau penyayau sereta pengasih,” ku iya nerang nyemetak.
Berebak enggau nya, Sima meri terima kasih ngagai Monica laban udah pechaya sereta meri peransang ngagai iya ulih mai lagu genre balada ti keterubah. Pekara tu chukup enda disadang, ku iya.
“Aku kala madah diri berasai kesal sereta enda pechaya ulih nyadaka lagu tu. Terima kasih mega ngagai Hairee laban udah ngemujurka pengawa rikoding lagu tu sampai ke tembu.
“Enda berasai labuh ai mata ketegal siruka diri empu, enda pechaya ulih mai lagu ke baka tu nyentukka begetar pala patung,” ku iya.
Nangkan ke nya, Sima madah lagu tu mega dituju khas nuju bala peminat ke seruran meri sukung kenyau ari suba sereta udah lama tetenggap ngasuh iya mai lagu berentak balada.
“Enti bisi pengurang tauka penimpang ba lagu tu aku minta ampun lalu pesan kepenudi iya nya sayau sereta beri basa mih ngagai semua orang ke disayau kitai lebih agi baka apai indai seagi sida agi ba dunya tu,” ku iya.
Lagu Seribu Taun Agi ke udah ayan ba laman youtube channel Sima Tawil empu kenyau ari 11 Januari 2021, naka tu udah mujur ngerikodka 18,000 orang meda. Bala peminat ti rinduka lagu-lagu ari Sima sebedau tu ulih meda terus ari laman youtube tu.
Ungkup penemu, kelimpah ari merindang Shima mega ngembuan batang pengawa nyadi pemacha berita Iban ba Unit Komunikasyen Perintah Sarawak (Ukas) sereta bejalaika pengawa dagang produk minyak angi.
Sima diatu nyadi pemacha berita Iban ba Unit Komunikasyen Perintah Sarawak (Ukas).

Suara Sarawak