KUCHING: Palan Penyakit Berampit Sarawak (SIDC) deka nanggam kerejasama enggau tiga serikat multinasional dunya dikena nyapai kualiti pengerai ke manah agi ba timpuh panjai.
Menteri Pelajar, Inovasyen enggau Pemansang Bakat, Datuk Roland Sagah Wee Inn madah, Sempekat Pemereti Ati tu ngaul serikat multinasional iya nya Pacific Biosciences (USA), Agilent Technologies (USA) enggau Numares AG (Jerman).
“Agenda ke deka diberi perati ba kerejasama tu mungkur pemansang peresa diagnostik, biomarker termostik enggau mega bidang genomik penyakit,” ku Sagah.
Sagah mansutka jaku nya lebuh nyimpul jurai Opis Menteri Pelajar, Inovasyen enggau Pemansang Bakat ba Aum Kunsil Nengeri (DUN) Sarawak, ditu kemari.
Nambahka nya, SIDC mega merambu ngatur kerejasama pansik pasal penyakit berampit enggau Opis Menteri Pengerai, Pusat Fenomena Nasional Australia, Amili Singapore enggau Universiti Monash.
Ku iya, pemansang teknologi probiotik rekombinan dikena nagang penyakit berampit enggau ngena pemakai dikena nyaga pengetan tubuh deka dikemerat ba pansik nya.
Ba lansa sama, iya mega bisi nyebut pasal pemansang bakat bekaul semikonduktor enggau mikroelektronik benung chakah dipejalai Sarawak Skills enggau CENTEXS enggau kerejasama Melexis ari Belgium, X-FAB dari Jerman enggau Synopsys of California.
“Kerejasama tu mega ulih nyendiaka peluang besai ngagai nembiak ti minat ba pengawa mikroelektronik enggau inovasyen ba langkar Litar Bersepadu (IC),” ku iya.
Sagah mega madah, pengawa numbuh Palan Sains Sarawak ti diperambu dipejalai taun tu dikeandal ulih nyapai tuju nempa nembiak landik sains.
“Nya kebuah, opis menteri aku enggau Kaunsil Pemansang enggau Pemansang Sarawak (SRDC) benung ngiga raban khas berati palan nya ngambi kitai ulih numbuhka palan sains bekualiti enggau komuniti pintar sains.
“Kami mega nentuka palan sains nya semampai disikap fasiliti moden nengah pengawa berati palan sains enggau teknologi ba serata dunya nengah gerempung profesional baka Palan Rentayan Sains enggau Teknologi Asia Pasifik (ASPAC),” terang iya baru.






