SIBU: Serakup Indu Dayak Sarawak (SIDS) Pampang Sibu diberi peransang numbuhka premis sida empu.
Menteri ba Opis Premier Sarawak, Datuk Seri John Sikie Tayai madah, pengawa ngempu premis kediri empu mayuh meri penguntung enti dibanding nyuwa.
Iya madah, sida ulih ngias enggau ngubah premis nya nitih langkar tengkebang ti dikedekaka sida empu.
“Manah agi ngaga premis diri empu laban tu deka meri SIDS identiti enggau ruang ti nemban dikena mansang,” ku iya.
Sikie mansutka jaku nya rambau Pengerami Makai Lemai Ngintu Genap Taun Ke-35 SIDS Pampang Sibu ditu, malam ensanus.
Nya alai, iya meransang SIDS ngiga tanah perintah kelebih agi ba tisi mengeri baka Sibu Jaya nyema ba genturung mengeri kelalu mar.
Iya ti mega Kaban Kunsil Nengeri (ADUN) Kakus nya madah, iya deka nyendia sukung ungkup pengawa minta tanah enggau mantu ngulihka agih belanja dikena numbuhka premis nya ari geran perintah tauka Premier Sarawak.
Nangkan nya, iya meransang mayuh agi raban indu Dayak nyadi kaban SIDS ngambi orgasnisasyen nya ulih nyungkak ngagai penyulut sosio-ekonomi, pelajar enggau dagang.
