SIDS: Pesaka patut ditampung rebak baru

KUCHING: Raban indu Dayak rebak baru patut besaup ngetanka pengawa bansa Dayak di menua tu.

Ex-Chairman Sarakup Indu Dayak Sarawak (SIDS) Tan Sri Empiang Jabu madah, iya ngarapka mayuh agi raban indu ke agi biak nyereta lalu ngaul diri ba pengawa SIDS.

“Kami ti nyadi pemungkal serakup tu udah ngemai nama SIDS ngagai penuduk tinggi sereta chukup dibasa.

“Diatu mih maya pemadu engkeman raban indu kelebih agi nembiak rebak baru nampung pengawa kami sereta besaup mantu bansa diri,” ku iya.

Empiang mansutka jaku nya lebuh dirandau pemberita rambau Pengawa Nyain Sempekat Pemereti Ati (MoU) entara Sarakup Indu Dayak Sarawak (SIDS) enggau Universiti Putra Malaysia (UPM) ditu apin lama ke udah.

BASA BESAI… Empiang chukup temegah enggau pengawa numbuhka ‘Tan Sri Empiang Jabu Research Chair in Dayak Women Studies’ ti ulih ngangkatka raban indu Dayak di Sarawak.

Nangkan nya ku iya, diatu sida udah nyurutka diri laban deka meri peluang ngagai sida ke biak megai ulu lalu ngemai serakup nya mansang agi ke mua nitihka singkang pemansang dunya.

“Enti ukai kitai mantu bansa diri, jauh agi bansa bukai deka mantu kitai. Pemadu manah nadai ngelui ari bansa kitai empu,” ku iya madah nyemetak.

Berebak enggau nya ku iya, pengawa numbuhka ‘Tan Sri Empiang Jabu Research Chair in Dayak Women Studies’ nyadi pekara ti chukup ngemegahka ati iya.

“Ba aku, tu basa pemadu besai diberi ngagai SIDS laban ngenang jasa ti udah bebendar ngatur pengawa sereta mantu indu Dayak ngelama tu.

“Lebih 60 taun serakup tu ditumbuh, mayuh pemujur udah dijapai sereta pengawa udah dipejalai dikena mantu enggau ngangkatka indu Dayak kelebih agi bansa Iban,” ku iya.

Semua tu enda mujur enti nadai pengeran enggau pengepuh bala ketuai ke dulu ti udah bebendar ngangkatka SIDS, ku iya nandu.

“Kepala Menteri mega udah ngungkupka agih belanja dikena bejalaika pansik pasal ‘Tan Sri Empiang Jabu Research Chair in Dayak Women Studies’ tu.

“Aku ngarapka ‘Tan Sri Empiang Jabu Research Chair’ ulih meri penguntung enggau pemaik ngagai semua bansa Dayak kelebih agi orang indu,” ku iya andal.

Nengah penemu dikemisi komiti tu, iya mega ngarap tu ulih mantu ngemansangka bansa Dayak dudi hari, ku iya nampung.

Kena 1 Ogos tu tadi, SIDS mujur nyain sempekat enggau UPM ngemujurka ‘Tan Sri Empiang Jabu Research Chair in Dayak Women Studies’.

Tuju komiti tu ditumbuh ngemai raban indu Dayak sama ngemeranka pelajar baka kus enggau latih ti diguna raban SIDS.

Kerejasama nya mega dikearap ulih nyadi pemungkal ngagai pemansang SIDS enggau indu Dayak nengah pelajar indu Dayak Sarawak.

KENANG… Chairman SIDS, Datuk Ir. Alice Jawan Empaling (tiga ari kiba), Ex-Chairman SIDS Tan Sri Empiang Jabu (tengah), Ex-Sapit Kepala Menteri Tan Sri Alfred Jabu Numpang (tiga ari kanan) sereta Naib Canselor UPM Datin Paduka Datuk Dr Aini Ideris begulai enggau bala bukai pengudah Nyain Sempekat Pemereti Ati entara SIDS enggau UPM ditu, apin lama ke udah.