BINTULU: Pengawa siku chalun bediri minta pilih ba Pengawa Bepilih Mit (PRK) Sitak Kunsil Nengeri (DUN) Jepak ti nyadung urung 1,000 kampit berau ngagai mensia mayuh dikena bekimpin benung dipansik raban Komiti Besai Nagang Penyalah Makai Suap Malaysia (SPRM).
Pekara nya ditukuka Direktor SPRM Sarawak, Datuk Mohd Zaki Hassan ti madahka raban pengawa khas ba Bintulu udah diasuh beratika pekara nya sekalika bisi pengawa makai suap.
“Kami meseti mansik dulu.
Aku deka mantaika pekara tu (ripot surat berita pasal pengawa nyadung berau) ngagai raban pengawa khas ba Bintulu,” ku iya nibak berita dikeluarka sebengkah surat berita menua tu, tadi.
Dulu ari nya kena Hari Dua, chalun Parti Aspirasi Rakyat Sarawak (ASPIRASI), Chieng Lea Phing, 62, rambau aum pemberita ba Bintulu madah kediri bisi nyadung urung 1,000 kampit berau ngagai mensia mayuh ba sitak nya.
Ku Lea Phing, iya udah nyadung 500 kampit berau ngagai raban begunaka bantu enggau raban orang seranta naka diatu.
Pengawa nyadung berau nya ku iya mandangka pengidup peranak ba Bintulu kelebih agi raban B40 majak tusah ketegal belanja idup ti majak tinggi.
Iya madah baru, nya ngelaika penanggul belanja idup niki enggau pemakai pemun nyadi pekara ti enda tau enda diberi perati enggau lengkas.
Lea Phing mega besemaya deka mutarka penanggul nya enggau meri subsidi semua bansa pemakai pemun kelebih agi berau ngambi ulih ngelempungka belanja idup rayat enti sema diberi mandat menang PRK DUN Jepak ila.
Iya ti nyadi orang dagang emas enggau hospitaliti ba bagi menua nya bisi peneleba nyau deka 10 taun dalam dunya politik enggau regas bejalaika aktiviti dalam parti ASPIRASI kenyau ari taun 2014.
