SARIKEI: Siku indu ti gawa perintah napi pengerugi urung RM17,000 pengudah ditipu siku lelaki ti nyaru diri nyadi polis.

Pemangku Tuai Polis Pelilih Sarikei, Deputi Superintendan Polis (DSP) Benedict Faris madah, kes nya nyadi kena 17 Januari (kemari) tu tadi.

Maya kes nya nyadi, ku iya, tudah ti beumur entara 30-an nerima kangau telefon ari saspek ti madahka diri ‘polis’ ari Semenanjung Malaysia.

Ku iya, maya ngaga kangau telefon nya, saspek madahka tudah bisi ngaul pengawa salah iya nya ngirum barang ti ngelanggar undang-undang.

Benedict madah, tudah dipinta mayar dikena mutar kes nya lalu tudah udah ngaga sekeda pengawa mindahka duit.

“Tudah semina nemu diri ditipu pengudah dirara laki iya empu.

“Berebak enggau nya, tudah ngaga ripot polis ba Balai Polis Sarikei ngambi kes dipansik silik,” ku iya ba sebengkah penerang tadi.

Benedict madah, kes nya dipansik ba baruh Seksyen 420 Kanun Keseksaan.

“Enti dikenuku salah ulih dijil enda kurang ari setaun enggau enda lebih ari 10 taun sereta diukum mata duit enggau dilunsin,” ku iya.