PADAWAN: Siku lelaki ditangkap lebuh mindah ari rumah betemu enggau bakih iya ketegal ngelanggar Atur Tagang Pejalai (PKP).
Ketuai Polis Pelilih Padawan Superintendan Aidil Bolhassan madah lelaki beumur 38 taun ari Kampung Panglima Seman Ulu, Petra Jaya ditangkap lebuh pejalai nginau lorong belakang Kedai Ninso, Jalai Matang urung pukul 6.30 lemai Hari Tiga tu tadi.
“Saspek enda ulih madah kebuah ke bendar iya mindah sereta ba luar lebuh PKP dipejalai.
“Tuju pejalai saspek ari rumah laban deka betemu enggau bakih iya taja nemu pasal PKP,” ku iya ba sebengkah penerang, tadi.
Ku Aidil, bela dirampas ari saspek iya nya seunit spana ijas, lapan unit mayuh bansa spana, empat batang ‘Allen Key’ macham pemesai, dua unit playar, sebatang kikir, siti kantung enggau sebuah motosikal.
Iya madah, saspek ditangkap ngereja penyalah di baruh Perkara 7(1) Peraturan-Peraturan Pencegahan Penyakit Berjangkit (Langkah-Langkah Dalam Kawasan Tempat Kejadian 2020) enggau Seksyen 186 Kanun Keseksaan.
Saspek udah dibai ngagai Opis Polis Kota Sentosa ungkup pansik silik lalu kes benung dipansik.
