SERIAN: Siku midang, dua balat bakal enggau siku semina bakal mimit aja ba penusah aksiden ti ngaul sebuah entukar bansa Toyota Corolla enggau Toyota Hilux di Jalai Kuching-Serian ditu, sehari tu.
Tuai Polis Pelilih Serian, DSP Neil Beginda madah, tudah ti midang nya siku lelaki beumur 20 taun ti deriba entukar Toyota Corolla.
“Tudah dikenuku midang pukul 11 pagi rambau diperubat di wad emijensi Sepital Serian ketegal balat bakal,” ku iya ba sebengkah penerang tadi.
Pia mega, ku iya, penumpang Toyota Corolla iya nya siku lelaki beumur 25 taun balat bakal ba kaki lalu deriba Toyota Hilux iya nya siku lelaki beumur 60 taun balat bakal ba tulang belakang sereta siku penumpang lelaki beumur 54 taun semina bakal mimit aja.
Neil madah, penusah ti diripot nyadi urung pukul 10 pagi nya nyadi berebak ari Toyota Corolla ti datai ari Kuching ke Serian tepawah lebuh mansa selikuh lalu ngelantak belakang Toyota Hilux.
“Nya ngujungka Toyota Hilux bepusin lalu ngelantak besi pemagi jalai muak ke kiba sebedau labuh ngagai darung.
“Nangkan nya, Toyota Corolla bela tepawah ngagai kiba jalai lalu ngelantak dinding semin ba ujung jematan,” terang iya.
Iya madah, kes nya dipansik ba baruh Seksyen 41(1) Akta Pengangkutan Jalan 1987.
