SARIKEI: Inisiatif ngelanchar pejalai trafik ba simpang jalai nuju Sepital Sarikei benung chakah dipejalai nengah pengawa nyeleti jalai ba endur nya.
Chairman Kaunsil Pelilih Sarikei (MDS), Kaunsilor Wong Zee Yeng madah, projek ti mungkur pengawa masang lampu trafik nya dipejalai ba timpuh tiga bulan lalu disadang tembu ba bulan November taun tu.
Enti udah tembu ila, ku iya, pekara nya deka ngelancharka pejalai trafik kelebih agi ari Sepital Sarikei ngagai jalai besai kelimpah nambahka tikas pengelikun penguna ti betengah ke jalai nya.
“Terima kasih ngagai Perintah Nengeri laban udah ngemendarka agih belanja dikena bejalaika projek tu.
“Pia mega ngagai Sapit Menteri Pengeraja Asal, Rampa Menua enggau Ubah Klimet ti mega Kaban Parlimen Sarikei, Datuk Seri Huang Tiong Sii laban mayuh udah mantu ba pengawa nyeleti tu,” ku iya lebuh ngabas taba projek kemari.
Ba lansa sebaka, Zee Yeng ngarap semua raban bekaul meri kerejasama ngambi pejalai projek lanchar lalu tembu ba timpuh ti udah ditaga.
Sebedau tu, perintah udah ngemendar agih belanja RM48.36 juta ungkup projek nyeleti Jalai Rentap dikena ngaga jalai dua arung nengah standard Opis Kereja Raya (JKR) R3 nyadi jalai empat arung nitih standard JKR U5.
Inisiatif nya ukai semina ngubah landskap Kampung Seberang tang mega ngelanchar pejalai trafik kelebih agi maya jam jalai sekut.
