Singkang Tim Projek Pensel majak gah

KUCHING: Tim Projek Pensel merambu ngerembaika atur aktiviti sida ngagai menua Kuching pengudah teulihka pemujur di Sri Aman.

Pemungkal Projek Pensel, Norina Umoi Utot madahka sida sebuat deka ngatur di Sungai Apong ditu enda lama agi.

“Besai juluk tim kami deka ngerembaika bungkur projek tu ti dipungkal di Sri Aman ujung taun 2015 suba ngagai bagi menua bukai.

“Taja pia, pejalai Projek Pensel di Sri Aman meruan dipejalai baka selama lalu deka dikemanah agi nitihka singkang pemansang pelajar kemaya hari kelimpah ari program pemansang bukai,” ku Norina ngelansa.

Ku iya, Tim Projek Pensel deka ngelawa raban diselinting di kandang menua pesisir kelebih agi di rumah panjai ti jauh kulu sungai, menua entigis baka di Lingga ngambi tuju projek tu tejapai.

NYERIDI ARI UMUR BIAK… Bala anak berengkah ari pra sekula disedia kelas belajar Jaku English ari Tim Projek Pensel.

Tambah mega, Projek Pensel deka direjista ba Opis Pengerejister Gerempung (ROS) dalam taun tu ngambika nyamai minta agih belanja ari opis enggau ejensi bekaul nentuka pejalai projek enda ditekul penanggul belanja.

“Kitai mega temegah ati meda pemanah sukung enggau timbal sepanjai Tim Projek Pensel ngemujurka aktiviti, sekalika ari bala nembiak, apai indai, raban sekula sereta peranak rumah panjai empu.

“Nadai kala pulai enggau jari puang kami sebuat tetiap kali ngatur program. Macham pemeri diterima, ke tanda basa, kelai kenang enggau pengingat dudi hari, begulai enggau sida ke nembiak, orang besai tuai enggau sida ke tuai.

“Tepantup ati mega meda bala nembiak jampat nangkap utai ke diajar aku empu. Dibai aku belagu, sida teperindang. Dibai aku nero sida nadai mayuh bantah. Dibai aku bejaku English, sida belajar lalu jampat nemu,” ku Norina nikalka kenang diri.

Ku iya, sida tu semampai dikenang, nyadika buah jaku lebuh bekenangka pengidup di menua laban endang penatai asal diri ukai orang ti pemisi, datai rumah panjai jauh kulu sungai sereta teleba ngasaika pemedis ngidupka diri.

KANGAU BASA… Norina nyuaka pemeri set pensel ngagai bala nembiak nyerumba pejalai nemuai ngagai Rumah Iran, Sungai Besai Pantu.

“Pelajar tu nyadika peransang dikena nyapai pemujur ba pengidup. Nya kebuah aku tatuk nyebut pemesai guna pelajar ungkup idup menyana jemah.

“Aku mega keran amat ngemai bala apai indai meransang bala anak sida besekula, kiruhka pensawa sekula sereta beratika pelajar bala anak sida,” ku Norina madah nyemetak.

TENGAU PENGIDUP… Seminar Peransang Pelajar Jaku English udah diatur kena 3 March tu tadi bepalan di sebengkah genturung pendiau di Simanggang.

 

GAGIT… Bala nembiak rindu belajar begulai enggau Norina.

 

ATI SIRU… Norina ngemai bala anak mit mendingka jerita dibai iya menua tasik lebuh pejalai aktiviti Tim Projek Pensek di Rumah Musa, Sutong di Simanggang.

 

NGASIKA AJAR… Bala nembiak bela gagit mendingka ajar ari Norina.