PENELEBA nepan odong-odong ngelingi Singkawang, Indonesia sekeda pengingat ti seruran dikenang sepanjai raun ke mengeri nya.

Entukar ti nyau baka becha nya kebendar asil modifikasyen lalu tebal agi ngembuan tiga tauka empat ruda sereta diias ngena lampu bekebelik ti bemacham chura kelimpah disempulang enggau muzik ti richah.

Muak ke malam, kami dibai bejalai ngelingi genturung Pasar Singkawang enggau gaya ti idup tang enda kelalu kiruh.

Lampu odong-odong nerang ke jalai lalu peranak lokal ti benung makai ba kedai makai enda jauh ari nya ngepai kami enggau tuchum manis ti tepanchar ba mulut sida.

Pekara nya mih ti nempa kenang manis sereta nambah pengagit kami deka nemu enggau silik agi pasal mengeri tu.

Asai ke enda menyana lebuh nemuai ke Kalimantan Barat (Kalbar) nyema enda ngindikka kaki ke Singkawang iya nya siti mengeri ti tebilang enggau nama Kota Amoi sereta Hong Kong van Borneo. Kebuah pia laban pesaka budaya komuniti Tiong Hua dia mengkang dikemeran enggau dijaga meruan.

MAYUH PENYELAI

Nyema milih raun ngelantang ati serimbai pengerami Taun Baru China ila, Singkawang mih palan ti patut dipasuk ba rintai endur ti dipilih kita.

Nama kebuah milih Singkawang?

Laban mengeri tu bela digelar Kota Seribu Kelenteng ketegal ngembuan mayuh tepikong ti nyadi kedap pengidup pengarap komuniti lokal dia. Sebedau ngindikka kaki di Singkawang, bemacham peragam bemain dalam runding aku.

Tang pengudah nemu Singkawang enggau silik agi, mengeri tu chukup lepa lalu mayuh begunan lama di genturung pasar ti agi beoperasyen nyentuk sehari tu.

Mayuh mega madah ke awak pemadu manah ungkup nemuai ke Singkawang iya nya lebuh pengerami Chap Goh Meh.

Maya nya, mengeri nya deka berubah nyadi panggau pengerami ti besai sereta richah.

Pengawa bejalai beraban Tatung, tanda naga enggau entukar berias deka nyadi pematak besai temuai lokal enggau menua luar datai kia.

Penemuai kami ke Singkawang nengah Familiarisation Trip Programme (FamTrip) PontianakSingkawang ukai semina meri perati ngagai Pasar Hong Kong tang dipun enggau pengawa nemuai ngagai Pasar Lama Turi.

Pasar tu chukup nyelai laban nyendia bemacham asil lokal enggau rega ti patut.

Muak ke pagi, gaya di pasar nya chukup kiruh ngambat penatai bala pengusung ngena bemacham produk pekayan, asil kebun, ikan rangkai enggau bemacham produk bukai.

PENYELAI ARI LANGIT

Udah nya, kami nerus pejalai ngagai Batu Belimbing, siti pematak temuai ti suah dikumbai penyelai ari langit. Batu nya diberi nama Batu Belimbing laban langkar batu nya baka buah belimbing lalu bisi lekuk enggau sukut ti tajam.

Palan tu engkeman amat endur belepa begulai enggau diri sebilik laban pengusung ukai semina ulih begambar bepelasarka rampa menua ti tulin tang bela nyendia mayuh aktiviti belepa.

Pengudah ngabas Batu Belimbing, kami sebuat dibai ngabas Tepikong Sui Kheu Thai PaK Kung ti nyadi rumah sembiang Tiong Hua pemadu besai sereta bediri reregah di Singkawang.

Penemuai kami sekali tu negapka agi mengeri tu nyadi palan ti chukup engkeman alai raun ngelantang ati kelebih agi rambau pengerami Taun Baru China.

Tembu merarau di siti restauran dia, kami dibai ngagai Pasar Singkawang ti penuh enggau begunan lama ti nyau bedijir.

Sekeda kedai ti enchuri perati kami iya nya kedai kupi ti diias ngena bemacham barang lama iya nya Warung Kopi Nikmat.

Kedai kupi nya ditumbuh ba taun 1941 ba begunan ti udah manggai lebih 100 taun iya nya sebedau Indonesia merdeka.

Kedai tu nyadi pilih enggau dikerindu ke mensia mayuh taja pen kafe hipster majak mayuh baka kulat ti tumbuh pengudah ujan.

Kupi ditu digaga ngena chara lama, semina ngena ai angat aja tang bau kupi tu chukup bebau rengut.

Bebelas iti bansa kuie bisi disimpan dalam jemari lama lalu pemeli sepeneka ati milih kediri nitih ke kuie ti dikedeka sida.

BAU RENGUT

Trikartina tauka rindu agi dikangau Alang, 55, menantu pengempu Warung Kopi Nikmat madah, iya rebak ketiga ti ngatur kedai kupi nya lalu ai irup ti dikerindu ke mensia mayuh ba kedai nya baka kupi, kupi susu enggau teh tarik.

“Begunan tu nadai berubah, semina dibali baru enggau diseruri mimit aja ba senentang ke jai aja.

“Tu mih ti ngasuh kedai tu nyelai sereta nerima mayuh pengusung nyengkaum ari menua luar baka Malaysia, Jipun, Korea, Australia enggau ti bukai,” ku iya.

Muak ke lemai nya mega, kami bepeluang nemuai ngagai Vihara Tri Dharma Bumi Raya, siti tepikung tuai di Singkawang ti bepalan di tengah mengeri nya.

Penyelai Singkawang majak nyengala lebuh siti masejit bediri reregah enda jauh ari endur nya ti ngelambangka pengelantang budaya enggau pengarap komuniti ditu.

Berasai timpang pejalai enti semina ngelala budaya Tiong Hua aja nyema enda nemuai ngagai Rumah Pesaka Ruang Bilik Tjhia.

Rumah Marga Thia tauka Thai Buk ba jaku Hakka Singkawang ti mai reti ‘rumah besai’ digaga ba taun 1901 enggau pemesai urung 5,000 meter persegi.

Bemalinka dokumen sejarah ti bisi dipandang dia, rumah nya diempu Chia Siu Xie iya nya siku orang ti belelang ari genturung pendiau Jian Mei, Pelilih Hai Chang, Fujian, Tiongkok ba jeman pegai kolonial Belanda.

GAYA TIONGKOK

Langkar rumah nya nitih gaya khas ari Tiongkok lalu keterubah suba semina rumah endur diau enggau opis dagang Chia Hiap Seng aja.

Tang diatu, rumah nya diuan peturun keempat nyentuk ketujuhan sida Chia sebilik.

Langkar begunan lama nya agi tegap mantu bala pengusung mereti ke chara idup komuniti dulu suba kelimpah nyadi palan ti narit ati.

Pengudah sehari suntuk bejalai ngelingi mengeri nya, kami ngetu makai Choi Pan Marga Tjhia, siti pemakai asal lokal ti bela dikumbai Chai Kue sereta bisi setipikit halal.

Entara perengka ti nyadi puak kuie nya baka tubu, kuchai, sengkuang enggau subung. Kami bela magi awak makai lemai di Kampung Rawit Tepi Sawah begulai enggau Sekretari Pelilih Kota Singkawang, Dwi Putra Sumarna.

Bemacham pemakai nyamai bisi dinah enggau gaya belepa seraya kami bekelala enggau pengari lokal kelimpah besilih buah penemu.

Pengudah nepan odongodong, kami ngujungka malam nya napatka CW Coffee ungkup ngasai kediri empu budaya bekupan malam hari komuniti lokal dia.

Ba hari kedua di Singkawang, kami meli krafjari kayu di Borneo Wood.

Sebedau pulai baru ke Pontianak enggau pulai ke Kuching, kami bepeluang nemuai ngagai Pantai Samudra Indah sambil makai mi enggau sekelim sebedau nerus pejalai diri.

SEKELIM INYAK

Di Singkawang, kami bemalam di Swiss-Belinn Singkawang ti bepalan enda jauh ari Grand Mega Mall lalu bisi fasiliti bas dia.

Aku pulai enggau siti simpul ti muntang: Singkawang ukai siti mengeri ti mejal temuai tekait ati tang siti mengeri ti ngajar kitai ngasai ke pejalai ti lubah agi tang besai reti.

Pengudah datai di Pontianak, kami bela dibai ngabas Masejit Raya Mujahidin sebedau nyepi Es Krem Angi, siti sekelim premium ti digaga kenyau ari 1950.

Narit ati agi, sekelim ditu dinah ngena buah inyak muda ti bemacham pengasai baka pengasai ketan chelum, rian, temedak enggau ti bukai.

Penemuai sekali tu bela meri peluang ngagai kami magi awak diri di Chemomile Authentic Spa ti nyendia pakej enggau rega ti narit ati.

Udah nya kami ngujungka pejalai kami di Pontinak makai begulai enggau Konsulat Malaysia di Pontianak, Azizul Zekri Abd Rahim di Hotel Transera, Pontianak.

Kami pulai ukai semina mai gambar enggau tepa aja tang peneleba berega pasal mengeri ti idup enggau budaya, nyaga pesaka sida sereta ngambat temuai enggau ati tebuka.

Engka tu mih kebuah tanah Kalbar ukai semina siti palan dagang temuai aja tang nyadi siti kenang berega ti seruran deka mai kitai datai kia baru. – NUR HAZIRAH SHUKUR