KUCHING: Pekit Tenpin Bowling Antarabansa Tebuka Sarawak (SIOTBC) 2026 ngayanka penau Sarawak nyadi entara venue dipilih endur ngatur pekit bowling tikas antarabansa lebuh 663 pemain ari menua tu enggau menua luar ngambi bagi.
Sapit Premier Sarawak, Datuk Amar Profesor Dr Sim Kui Hian madah, bala pemain lokal enggau antarabansa ke datai nya ngayanka pekit nya mujur nyadi pelasar ke ngempuruka atlit ari mayuh menua.
“Kitai temegah ati ngelalu penatai pemain bowling ari Singapura, Thailand, Hong Kong, India, Chinese Taipei, Vietnam enggau Brunei, begulai enggau bala pemain Malaysia.
“Tu mih reti utai ku aku lebuh aku madahka antarabansa, iya nya ngangauka orang ari menua bukai sama enggau bemain tenpin bowling.
“Nya alai, ngagai semua pemain ari Malaysia, kita nemu enti kita mujur datai kitu, reti nya, kita bela nyulut baka pemain ari Hong Kong, India, Vietnam, Brunei enggau menua bukai,” ku iya.
Iya nibarka jaku nya ba mua mayuh maya Pengerami Nutup SIOTBC 2026 di Megalanes Sarawak, Batu Kawa ditu Hari Enam.
Datuk Amar Dr Sim madah, pekit antarabansa diatur di Megalanes mega ngayanka penau Sarawak nyendiaka venue ke engkeman ungkup pekit main tikas antarabansa.
Ku iya, pekara nya chukup ngemegahka laban Megalanes ke baru beumur urung 10 taun udah mujur nyadi venue ngagai mayuh pekit antarabansa, nyengkaum Pekit Dunya Nembiak Gerempung Bowling Antarabansa (IBF).
Kaban Kunsil Nengeri (ADUN) Batu Kawa nya madah baru, Pekit IBF nya sebedau tu ngempuruka pemain ari 34 menua, lalu nya meri peneleba ngagai atlit biak lokal bepekit enggau pemain antarabansa.
Seraya taun baru, kitai deka meda pengawa ngatur pekit tenpin bowling maya Lumba SEA 2027 di Kuching lalu nya ngenegapka agi venue nyadi kelang bowling antarabansa ke tebilang.
Sama datai, Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu, Senator Dato Ahmad Ibrahim, Pemangku Tuai Unit Pemansang Lumba enggau Main, Kaunsil Lumba Sarawak (SSC) Dedia Sarini Ahmad, Presiden Serakup Tenpin Bowling Sarawak (ABAS) Sunny Si Poh Heng enggau Mandal Presiden ABAS Shaifulbari Shukri. — EDISI UKAS
