MIRI: Mensia mayuh dikangau ngulu Siri Licha Sarawakiana ti pejuluk Jaku Etnik Sarawak: Pemar Nyaga di Jeman Global kena Hari Satu (23 Februari) tu berengkah ari pukul 2 nyentuk 5 lemai di Auditorium Pustaka Nengeri Sarawak Pampang Miri.
Program ti diatur Pustaka Nengeri Sarawak Pampang Miri nya dikena nambah pengeleda komuniti pasal guna nyaga jaku etnik Sarawak ti majak napi pemar ba jeman globalisasyen enggau pemansang teknologi kemaya hari.
Pegawai Pustaka Nengeri Sarawak Pampang Miri, Davidsal Jimmy Berayen madah, jaku etnik ukai semina pelasar komunikasyen tang nyadi identiti, pesaka budaya enggau pelasar ngenatai penerang ngagai komuniti pupu bansa di nengeri tu.
“Ubah besai sosial, pemansang teknologi enggau seruga global meri pemar baru ngagai inisiatif nentu jaku etnik terus ditampung rebak dudi.
“Nya alai, program baka tu beguna amat dikena negap pengeleda komuniti ngagai pemesai guna nyaga jaku nyadi sebagi ari pesaka intelektual enggau identiti begulai Sarawak,” ku iya ba sebengkah penerang.
Pengelicha ari Curtin University Malaysia, Elia Bit deka dikangau khas bekunsi peneleba, pemar ti amat enggau inisiatif praktikal nyaga jaku etnik Sarawak.
Davidsal madah, sesyen nya bela nyendia ruang interaktif ngagai bala penyereta nengah sesyen tanya saut sereta randau begulai enggau pengelicha dikena meransang pengawa besilih buah runding konstruktif.
“Tu seriris enggau inisiatif betampung Pustaka Nengeri Sarawak ba pengawa nyaga, ngaga dokumentasyen enggau ngelaku pesaka budaya nengeri ke pemaik rebak diatu enggau rebak dudi,” ku iya.
Mensia mayuh ti bisi ati deka ngambi bagi program tu diperansang rejister diri nengah pengawa scan kod QR ba kereban ngelaku rasmi program tauka nengah link ti disedia.
Penerang silik ulih betanya ngagai Ahmad Samsudin, Davidsal Jimmy Berayen tauka Mohd Nizam Abd Takip ba lumur 085-422525 tauka neresa website tauka media sosial rasmi Pustaka Nengeri Sarawak.
