DARO: Sitak Rajang deka nyadi palan pemansut baru Sarawak, ku Premier Datuk Patinggi Tan Sri Abang Johari Tun Openg.

Taja pia, iya enggai nerang silik laban nya agi diperambu tang meri ulu lungga, sitak nya deka berubah nyadi baka Emiriyah Arab Bersatu.

“Siti pemansut baru deka datai ari sitak tu ila tang aku enggai madah dulu, ukai deka ngelalai tang takut aku bula.

“Awak aku ngadu manah dulu lalu sitak tu deka nambahka penatai pemisi Sarawak,” ku iya.

Abang Johari mansutka jaku nya lebuh bejadika Stesyen Minyak Petros – Daro, ditu tadi.

Iya mega madah, Ejensi Pemansang Delta Rajang (Radda) mega udah ngerintai projek ti dikemerat dikena ngubah pemansang ekonomi ba sitak nya.