KUCHING: Siti kes positif Covid-19 diripot di pelilih Sibu seharitu ngujungka penyampau semua kes positif di Sarawak manggai 573 kes.

Ku Sapit Kepala Menteri Datuk Amar Douglas Uggah Embas, kes ke-573 nya ngaul siku peranak Malaysia ari Sibu ti gawa nyadi injinir ba sebuah serikat minyak enggau gis di Arab Saudi lalu pulai ke menua kena 3 Julai nepan bilun Saudi Arabia nengah KLIA.

“Iya udah beperesa RTK Antigen Covid-19 lebuh datai ba KLIA tang pemutus negatif.

“Sebedau pulai ke Sibu, iya diau bemalam ba Tune Hotel KLIA kena 3 Julai lalu pulai ke Sibu kena 4 Julai sereta dibai ngagai palan kuarantin di Sibu,” ku Uggah ba aum pemberita ninting hari ripot Covid-19 di Begunan Dun Lama ditu tadi.

Iya ti mega Chairman Komiti Penyangga Penusah Ngenyit Nengeri Sarawak (JPBNS) madah, orang nya udah beperesa swab kena 6 Julai lalu pemutus rT-PCR ari Makmal Sepital Sibu nunjukka positif Covid-19 kena 7 Julai tu tadi.

“Iya nadai ngayanka sebarang kelai Covid-19 lalu udah dipasuk ngagai Sepital Sibu kena Hari Dua ngambika diperubat,” ku Uggah.