Siti kluster baru ngerekai di Miri

KUCHING: Opis Pengerai Nengeri Sarawak (JKNS) madahka Sarawak ngerikod kluster baru dikumbai Kluster Rakut ba Pelilih Miri.
Indeks kes ngagai kluster tu iya nya kes ke-1,740 ti udah ditemu nengah pengawa beperesa kontak ngagai kes positif Covid-19 kena 12 Januari tu tadi.
Asil pengawa nyidi kontak ngagai kes tu, semilan agi kes udah ditemu nyengkaum enam kes baru tadi.
Pelilih Kanowit udah bebali ari status kuning ngagai status oren pengudah ngerikod 29 kes berampit dalam menua ba timpuh 14 hari ke udah.
Ba lansa bukai, Pelilih Subis ba Bagi Menua Miri seraya Belaga ba Bagi Menua Kapit udah bebali ari status gadung ngagai status kuning ngerikod tujuh kes nyengkaum tiga kes baru ngaul kes berampit dalam menua ba timpuh 14 hari ke udah.
Sarawak ngerikod 156 kes baru positif Covid-19 ke alai 65 kes ba Sibu, 28 kes di Miri, 24 kes di Kanowit, 15 kes di Beluru, 10 kes di Sarikei enggau tiga kes di Sebauh.
Pia mega, bela dua kes di Kuching, Bintulu enggau Subis sereta bela siti kes di Dalat, Belaga, Meradong, Samarahan enggau Daro ngujungka kes nambah ngagai 2,367 kes.
Naka tu, lapan kluster agi ngerekai ba Sarawak baka Kluster Rakut di Miri, Kluster Bukit Sekubong di Sebau, Kluster Jelita di Miri, Kluster Pasai di Sibu, Kluster Keranji Tabuan di Kuching, Kluster Bah Sayap di Miri, Kluster Stutong di Kuching enggau Kluster Mador di Meradong.

Suara Sarawak