SK Mujong Tengah di Kapit sebulan udah ngetat pemerinsa nadai karan

KAPIT: Penusah ke ditapi Sekula Primari (SK) Mujong Tengah ditu patut diputar lengkas.

Urung 22 iku nembiak enggau 15 staf nyengkaum pengajar, kepala pengajar sereta pemantu ba sekula nya ngetatka penanggul enggau pemedis nadai karan kenyau sebulan ke udah.

Nitih penerang ari Buletin Kapit, Sarawak ke dikerembai nengah media rama madah pemedis ke ditapi sekula primari nya balat dikemanaka mensia mayuh.

Beduduk ari nya, Suara Sarawak nampung tesau ngarapka pekara tu nerima perati ari piak bekaul.

SK Mujong Tengah bepalan jauh ba menua ulu Kapit iya nya urung 80 kilometer ari pasar Kapit.

ULIH DIKENCHADI…Lampu memarin dikena bala nembiak maya malam hari.

Enti nengah jalai sungai ngambi awak pengelama empat jam 30 minit iya nya nengah Sungai Rajang lalu tama ngagai Sungai Baleh.

Udah nya mudik Sungai Mujong ke mayuh wong sereta ombak besai.

Sekula tu kala diperambu digempung begulai enggau sekeda sekula bukai ngambika diengkah ba siti endur.

Begunan sekula digaga besimen baka bilik kelas, bilik pengatur pengawa, buding enggau palan makai.

Pemesai begunan tu ulih muat urung 200 iku nembiak.

TERPAKSA…Piak kantin sekula nyumai sereta ngereja pengawa bukai ngena lampu memarin.

Ungkup bekal pemakai nembiak ke bemalam ba buding, iya dianjung seminggu sekali, tang pengudah genset ba sekula nya rusak.

Jam nganjung barang pemakai nya berubah ketegal nadai karan.

Tu ngujungka sekula nya betapi enggau penanggul sereta mayuh apai indai nembiak sebana.

Penanggul tu ngujungka bala nembiak enda nyamai belajar laban gaya hari ti kelalu angat.

Pia mega, sekula ti petang ngujungka bala nembiak ke bemalam ba buding berasai takut laban teleba ba rumah panjai bisi karan solar 24 jam, ku siku apai indai nembiak ari sekula nya madah ngagai Suara Sarawak.

NADAI PILIH BUKAI…Staf sekula nyau meli genset kediri laban end tan ngetatka penanggul ditapi.
gambar

Beduduk ari nya, piak PIBG sekula nya nyadaka pengirau ati bekaul nasib anak sida.

Sida tusah ati ngenang penusah bala anak belajar petang enggau makai tengahari ba endur ke angat.

Nitih penerang, tukang masak nyendiaka pemakai ngagai nembiak ba endur ke piam semina ngena dian enggau lampu memarin.

“Diatu udah sebulan sekula kami petang. Kami apai indai enggau PIBG SK Mujong Tengah minta genset nya digaga enggau lengkas ngambika bala anak kami ke belajar ba sekula nya enda bangat ngasaika penusah sereta lantang belajar ba nembiak ba sekula bukai,” ku iya.

MELI KEDIRI…Staf sekula nyau meli minyak petrol kediri.

Suara Sarawak