KANOWIT: Sekula Primari (SK) Sg Tuah ditu kena penusah bah pagitu tadi, beduduk ari gaya hari ke berunggu ujan sepanjai malam kemari.
Pemesai Pengatur Penusah Ngenyit Sekula SK Sg Tuah, Enzebius Anak Moses madah tikas penalam ai bisi empat kaki mungkur padang sekula.
“Taja pia, tikas ai ke bah tu enda ngeruga pengelikun nembiak enggau pengajar sekula. Pengawa belajar enggau ngajar dipejalai baka selama,” ku iya maya dirandau Suara Sarawak pagi tadi.
Naka berita tu dikarang agi nadai sebarang pengawa mindah dipejalai.
Ungkup penemu, penyampau nembiak ke belajar ba sekula tu bisi 53 iku lalu pengajar bisi 14 iku lalu disaup tujuh iku staf pemantu.
