KUCHING: Sekula Sekondari (SMK) Long Bedian, Baram ti keterubah iya diaku nyadi palan napi peresa Sijil Pelajaran Malaysia (SPM), nurai sejarah pengudah 43 chalun mujur pas bulih setipikit.
Lebih manis, siku nembiak benama Willfred Anyie Wellis nempa penyulut bulih pemutus 8A seraya ngemegah nama sekula ti baru aja diseleti nyadi Sekula Model Khas Komprehensif 11 (K11).
Menteri Pelajar, Inovasyen enggau Pemansang Penau, Datuk Seri Roland Sagah Wee Inn madah, pemujur tu nunjukka penyulut pelajar nadai ngelala adan menua taja pen SMK Long Bedian jauh di menua ulu.
“Willfred bulih semua A dalam semua subjek ti diambi iya udah nunjukka nembiak menua pesisir mega ulih nyulut baka nembiak di mengeri.
“Tu siti pemujur ti chukup ngemegah lalu aku ngarapka pekara tu ulih ditan sereta ditandu ba taun baru,” ku iya ba aum pemberita mantaika pemutus SPM 2024 ungkup Sarawak, ditu tadi.
