SMK Saint Augustine nempa hatrik

Tiga taun bejurut sida nyadi champion penuh Program Bejalai Bebala Mayuh Gawai Dayak Renggat Menua Betong

BETONG: Pengelelak sepemanjai tiga minggu nyendia diri dikena ngetanka gelar champion nyadi nyata lebuh kontinjen Sekula Sekondari (SMK) Saint Augustine sekali agi dipadu nyadi champion penuh Program Bejalai Bebala Mayuh Gawai Dayak Renggat Menua Betong 2019 ba ditu, kemari.

Nyadi champion tiga taun berunggu kenyau 2017 tu nyadi kenang manis ngagai nembiak enggau pengajar ti mungkur ba pengawa tu kelebih agi mujur mai pulai perais duit RM13,000 sepengudah nyadi champion renggat C iya nya sekula sekondari.

Kepala Pengajar Paul Langgang madah, taja ngelama tu enda ngarap ulih nempa hatrik (menang bejurut), tang semua pengajar enggau nembiak ti mungkur ba pengawa tu udah besedia penuh.

“Aku andal ati lalu gelar champion tu ungkup semua pengajar enggau nembiak SMK Saint Augustine asil kerejasama sepengelama tiga minggu.

CHAMPION PENUH…Douglas Uggah enggau temuai bukai begambar kenang enggau kontinjen SMK Saint Augustine sepengudah Program Bejalai Bebala Mayuh Gawai Dayak Renggat Menua Betong 2019 di Balai Lumba Tan Sri Datuk Amar Stephen Kalong Ningkan, ensana.-Gambar OSMAN RAZALI

“Bulih gelar champion penuh tiga taun bejurut tu kenang ke pemadu berega,” ku iya rambau dirandau Suara Sarawak sepengudah tembu Pengawa Bejalai Bebala Mayuh Gawai Dayak Renggat Menua Betong 2019 di Balai Lumba Tan Sri Datuk Amar Stephen Kalong Ningkan, ensana.

Paul nerang, entara penegap kontinjen tu iya nya penyampau penyereta pemadu mayuh iya nya lebih 120 iku nembiak nyengkaum bala pengajar.

“Aku temegah ati senentang ngatur pengawa tu kelebih agi sida ngena ngepan asil penau sida empu,” ku iya.

Ba pemutus penuh, Opis Betanam Betupi Bagi Menua Betong (Sempulang Gana) dipadu nyadi champion ba kategori A iya nya ejensi perintah, badan bekanun sereta swasta. Opis Tana enggau Survei (JTS) Bagi Menua Betong Chairman Penyerakup enggau Pengintu Tanah Sarawak (SALCRA) sereta ba penuduk lumur dua enggau lmur tiga.

Kelimpah champion ba kategori B iya nya rumah panjai, gerempung ukai perintah(NGO) enggau pasar dipegai Kampung Remabong, penuduk lumur dua diberi ngagai Komiti Pemansang enggau Pengelikun Genturung Pendiau (JKKK) Rh Penurin sereta Nembiak Bukit Saban bulih lumur tiga.

RAMI… Urung 1,400 komuniti ke diau ngelingi menua nya nedat Balai Lumba Tan Sri Datuk Amar Stephen Kalong Ningkan, ensana.

Pia mega, ba kategori C iya nya sekula sekondari, SMK Saint Augustine dipadu nyadi champion. SMK Datuk Patinggi Kedit enggau SMK Ulu Layar ba penuduk lumur dua enggau lumur tiga.

Sekula Primari (SK) Nanga Passa mega ngetanka penuduk lebuh sekali agi dipadu nyadi champion ba kategori kepenudi iya nya D. SK Saint Augustine bulih lumur dua lalu SK Bartholomew ba lumur tiga.

Ungkup tiap kategori, champion bulih perais duit RM3,000 besereta setipikit enggau trofi. Lumur dua mai pulai perais duit RM700 besereta setipikit enggau trofi lalu perais duit RM500 besereta setipikit enggau trofi ungkup pemenang lumur tiga.

Sida dinilai nitihka pengelain, gari, sepanduk enggau pengawa bejalai bebala mayuh.

Kelimpah semua kontinjen ti kurang benasit manah mega diberi perais sagu hati RM200.

Pengawa bejalai bebala mayuh sepenyauh 2.2 kilometer bepun pukul 7.00 pagi nya dichurak enggau penyereta 28 kontinjen (dua dikangau) mungkur urung 1,500 raban komuniti bejalai ari Kompleks Lumba Betong neruska pejalai ngagai Pasar Lama Betong nyentuk ngagai Balai Lumba Tan Sri Datuk Amar Stephen Kalong Ningkan.

Pengawa bejalai bebala mayuh tu lanchar sereta likun dipejalai.

Direktor Kolej Vokasional Betong ti nyadi Chairman Komiti Induk Pengerami Lim Ah Juan ngaku program baka tu nunjukka penegap penyerakup komuniti di Betong lebuh meda penyereta ari mayuh bengkah pupu raban bansa.

Iya ngarapka semengat baka tu ulih diteruska.

Bisi datai rambau pengawa tu iya nya Kaban Parlimen Betong Datuk Robert Lawson Chuat, Residen Bagi Menua Betong ti nyadi Penyanding Penemu Komiti Induk Pengerami Friday Belik, Injinir Unit Opis Kereja Raya (JKR) Bagi Menua Betong lalu nyadi Chairman Komiti Pengawa Bejalai Bebala Mayuh Chiresly Francis Kureng enggau Pemesai Pelilih Betong Sofhi Jebal.

Suara Sarawak