SMK Saratok nerima kereban ICT

SARATOK: Pemansang Arus Penyambung enggau Teknologi Pemadah (ICT) beguna amat kelebih agi ngagai bala nembiak ba sekula menua pesisir.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju, madah, dunya pelajar kemaya hari begunaka perengkaguna enggau kereban ICT.

Ku iya, bala nembiak ke belajar di menua pesisir enda patut dikelaung ngasaika pemaik bekenaka perengkaguna nya ngambi tetitihka singkang bala bakih besekula di mengeri.

“Aku ngarapka pemeri perengkaguna ICT tu ulih dikena bala pengajar ngemansangka pelajar enggau nempa nembiak ti landik bekenaka aplikasyen digital.

“Nya kebuah aku bisi amat pengandal rebak baru enda tinggal ba pelajar laban nerima arus penyambung ti deras ari pemisi tiang pemanchar didiri semak sekula udah tu,” ku iya.

Ali mansutka jaku nya ba Pengawa Nyuaka Kereban ICT Sekula Sekondari (SMK) Saratok ditu, pagi tadi.

Suara Sarawak