KUALA LUMPUR: Pengawa meranak puku konsortium dikemudi SoftBank ba pelasar pemintar digaga (AI) di Malaysia bukti pengandal global ngagai pengulih menua, ku Menteri Besai, Datuk Seri Anwar Ibrahim.
Iya nyemetak madahka inisiatif nya kelai pemujur besai ba transfomasyen digital enggau nyukung juluk nentuka Malaysia Menua AI manggai 2030 nengah Pelin Pemansang AI Nasional 2026-2030.
Berindik ari penerang konsortium ti mega mai Grab Holdings Ltd (Grab) enggau Petroleum Sarawak Bhd (Petros), Anwar ngelalu pengawa meranak puku ba Pelasar Infrastruktur AI di Sarawak enggau Semenanjung Malaysia.
Nitih ke penerang, Tuai Pegawai Eksekutif SoftBank, Masayoshi Son milih Kuching, Sarawak enggau Semenanjung Malaysia nyadi palan meranak puku infrastruktur AI beungkus US$50 bilion.
Nya kebuah, Anwar ngadang pengawa meranak puku nya deka nempa kereja landik enggau peluang dagang lalu perintah deka bekerejasama enggau raban bekuasa nengeri dikena ngemuntang pejalai projek ti nitihka peneka Perintah Besai enggau Nengeri.
Berebak enggau nya, konsortium nya mantaika perambu puku tumu AS$1.85 bilion ungkup pemansang infrastruktur AI di Sarawak enggau Semenanjung Malaysia, ke alai AS$1 bilion diperambu ungkup Sarawak enggau AS$850 juta ungkup Semenanjung.
Anwar ngarapka pengawa meranak puku nya ulih nyendia pengawa puang landik, nambah penau rayat Sarawak ba bidang AI sereta meri peluang ngagai kompeni menua mekal barang enggau servis.
Ba Sarawak, pemansang pengereja pengawa menua entara dikemerat perintah nengeri nentuka pengawa meranak puku ba sektor teknologi tinggi ulih meri pemaik ekonomi ti besai agi.
Nangkan nya, pengelebih Sarawak mansutka kuasa ulih dikena baru, pemansut ai enggau pemansang infrastruktur digital entara kebuah ti nyukung perambu meranak puku AS$1 bilion ari konsortium dikemudi SoftBank Group Corp. dikena ngemansang infrastruktur AI ba nengeri nya.
Perambu meranak puku nya ngaul kerejasama SoftBank, Grab Holdings Limited enggau Petroleum Sarawak Berhad (PETROS) nengah Sempekat Pemansang Begulai (JDA) ti dibantai kena Hari Lima, berindik ari sempekat ti disain bulan Oktober tu tadi.
Nitih ke penerang dibantai ketetiga kompeni nya, perambu puku tumu ungkup projek di Sarawak nyerangkung AS$800 juta ari SoftBank, seraya Grab enggau PETROS meri AS$100 juta.
Projek ti dikemudi SoftBank nyadi pemegai saham majoriti nya nyelinting pemansang kapasiti AI computing nyentuk lima gigawatt ba timpuh panjai ti dipejalai berenggat nitih peminta pemansang enggau penguna.
Dulu ari nya, Premier Sarawak, Datuk Patinggi Tan Sri Abang Johari Tun Openg madahka pengelebih nengeri ari sukut bekal kuasa, pemansut ai enggau infrastruktur digital meri pengulih besai ngagai Sarawak matak pengawa meranak puku ba sektor teknologi tinggi, kelebih agi palan data enggau AI.
Ku iya, pemansang industri nya begunaka bekal kuasa ti tegap sereta fasiliti sukung ti chukup nentuka operasyen ulih dipejalai lanchar enggau meruan.
Abang Johari mega nyemetak madahka Perintah Sarawak silik ba pengawa meranak puku palan data nengah beratika pemaik ekonomi, kelebih agi pengawa puang ungkup rayat.
“Aku nerangka Sarawak chukup silik nerima pengawa meranak puku palan data lalu pengawa nya meseti nyendia pengawa puang,” ku iya.
