KUCHING: Pengelebih ari sukut palan strategik, ungkus kuasa ti kompetitif sereta pemayuh pengereja landik nentuka Sarawak palan ti ulih matak mayuh agi pengawa meranak puku, kelebih agi ba sektor industri teknologi moden.
Premier Sarawak, Datuk Patinggi Tan Sri Abang Johari Tun Openg madah, Sarawak bisi sekeda pengelebih ti ulih dikena pemeranak puku, nyengkaum tarif kuasa karan pemadu baruh ba rantau tu sereta penau ngemansang bekal kuasa kediri.
Ku iya, kelimpah ari kuasa enggau endur, polisi perintah sereta sistem pelajar nengeri mega entara pekara patut diperunding pemeranak puku sebedau ngaga pemutus meranakka puku.
“Sapa-sapa ti deka meranakka puku ba sesebengkah endur udah tentu deka nentuka puku diperanak sida meri penguntung. Nadai sapa ti deka meranak puku ba kompeni ti meri pengerugi.
“Nya kebuah, lebuh Sarawak bisi mayuh pengelebih ti ulih nguntungka pemeranak puku, nama kebuah sida datai lalu meranak puku ditu?” ku iya nengah randau Forum Idar Industri Standard Chartered– Invest Sarawak BMCC di siti hotel, ditu kemari.
Tuai Pegawai Eksekutif Interim, Tuai Unit Penerang enggau Tuai Pegawai Pekara Wang Standard Chartered Malaysia Mushahid Syed udah nyadi pematak randau.
Ku iya, pemeranak puku mega meseti ngira ungkus ngeluar, nyengkaum belanja ti disedia institusyen bank nentuka projek ti dilanggur mujur dalam timpuh panjai.
Ku iya, pengawa nisih belanja enggau model meseti dipejalai serap sebedau pemeranak puku ngaga pemutus, kelimpah ngira untung ti diulih.
Abang Johari madahka sukut pemansang penau dikemerat laban pemeranak puku ukai semina beratika perengkaguna kuasa enggau ai, tang mega beratika polisi perintah sereta sistem pelajar ti ulih nempa pengereja landik teknologi moden.
Ku iya, ubah landskap ekonomi dunya diatu begunaka Sarawak semampai nemu utai ti nyadi berindik ari teori enggau inisiatif ekonomi lama nadai agi mandangka realiti ekonomi baru.
“Suba, kitai ngemerat puku enggau ngempu tanah, tang diatu pekara nya udah berubah.
“Microsoft nadai tanah ti besai, tang kompeni nya ulih nguasa makit dunya.
Sama mega enggau Zuckerberg ti nadai begunaka tanah dikena ngemansang Facebook, tang bisi bejuta penguna,” terang iya.
Nya alai, ku iya, sektor bank, pengawa meranak puku enggau industri meseti semampai neleba kediri enggau ubah ekonomi sereta pemansang teknologi nentuka Sarawak mengkang besemekih.
