BARAM: Perintah Sarawak bebendar deka ngerembaika kuasa karan di menua pesisir nengah inisiatif projek solar hibrid.
Sapit Menteri ba Opis Premier Sarawak (Pekara Pengereja Pengawa, Imigresyen enggau Patau Projek) Datuk Gerawat Gala madah, taja pen sistem solar hibrid nyadi chara mutar sementara aja tang perintah tetap ngembuan juluk deka nyendiaka kuasa karan di menua pesisir ngagai grid kuasa karan besai di nengeri tu.
“Perintah Sarawak ngembuan pelin timpuh panjai dikena nentuka menua pesisir bulih bekal kuasa karan 24 jam, sebaka enggau di mengeri.
“Tu nyengkaum ngemansang tali transmisyen ari Logan Bunut ngagai Limbang nengah chara nyambung rumah panjai besemak enggau nya,” ku iya lebuh bejaku ngarika Menteri Industri Pemakai, Komoditi enggau Pemansang Wilayah Datuk Seri Dr Stephen Rundi Utom rambau Pengerami Bejadi Projek Solar Hibrid di Kampung Long Atip ditu, kemari.
Taja pia ku iya, perintah napi pemar ti besai berindik ari kandang menua dalam Sarawak ti mungkur nyau deka 98 peratus pemesai tanah menua tu.
Iya madah, penyulut ti nyata udah dijapai ke alai urung RM2 bilion udah dipelanja Perintah Sarawak dikena mai kuasa karan ngagai menua pesisir.
Kelimpah ari nya, Perintah Besai mega meri bantu dalam pengawa ngerembaika agi projek solar hibrid ti nyadi tanggungpengawa beguna dalam ngerapitka takah kuasa karan ba genturung pendiau ti jauh.
Kaban Parlimen Baram, Datuk Anyi Ngau siku ari tuai beguna ti chukup vokal ngetanka hak rayat ba kandang menua iya.
Iya mega suah dikumbai ‘YB Jalan Balak’ ari bala bakih di Parlimen endang seruran gawa nentuka rayat di menua pesisir bulih akses ngagai jalai alun ti manah agi sereta perengkaguna pemun baka bekal kuasa karan enggau ai beresi.
Ku Anyi, pengeransing ti dibantai iya endang beguna ungkup pemansang Baram laban enti nadai pemansang jalai alun enggau perengkaguna pemun, komuniti dia deka mar maju sereta mansang. – ARIANA FIDELIA
