KUCHING: Kaban belayan dua iku soldadu ke lenyau maya operasyen di Pulau Perak, Koperal David Edmund Rapi enggau Koperal Moses Logers asa sereta enda labtang ati enggau ulah Raban Soldadu Malaysia ti ngemaduka pengawa ngiga enggau nyelamat (SAR) dua soldadu nya.
Thony Hilo Logers, menyadi tuai Moses madah, kededua kaban belayan enda lantang ati enggau piak ATM laban puntan meri penerang pasal SAR ke dipejalai.
“Kami ngasaika pengelantang sida sebilik ke dituntung penusah nyau nadai dikeibuhka ATM, tambah mega sida enda kala datai ngabas meri jaku peransang.
Thony madah, ruang bilik ke ditinggang penusah mayar kediri empu tambang ngagai Semenanjung Malaysia sereta Pulau Perak keran ngiga penerang pemadu baru sereta beratika Operasyen SAR ba palan nya.
“Nadai siku kaban soldadu dipeda maya Operasyen SAR dipejalai, udah nya servis Soldadu Langit dikemadu pengudah puntan tetemuka sebarang kelai.
“Kami pulai ke Sarawak enggau jari puang sereta asa laban nadai sebarang penerang pasal Moses ditemu, kelimpah semina dikemendar ba pulau nya pengelama sejam.
Operasyen SAR pengelama seminggu ku iya, sigi enda chukup laban penusah tu bekaul enggau nyawa mensia, tambah mega iya ke lebih berat sida tu kaban ATM.
“Enti nitih semua ejensi baka PDRM, Bomba enggau JPAM sereta ejensi bekaul patut sama ngambi bagi ba SAR nya,” ku iya ba sebengkah aum pemberita di Batu Kawah tadi.
Ku iya, sida sebilik udah ngaga ripot polis ba Balai Polis Arau pasal Operasyen SAR nya.
Udah nya, menyadi David Edmund, Morni Edmund Rapi mega asa enggau penerang ATM ti nyebut kes kaban soldadu lenyau maya operasyen pekara mit.
Ku Morni, operasyen SAR ke digaga baka semadi nadai laban enda lama aja digaga udah nya dikemadu.
Tandu Morni, sida sebilik ngarapka ATM neruska pengawa SAR, lalu patut mai mayuh agi ejensi ngiga seduai ke udah lenyau.
Kededua kaban belayan Moses enggau David merambu bejalaika atur undang-undang dudi hari tauka mai pekara tu ngagai piak pemesai politik.
