KUCHING: Dewan Bandaraya Kuching Utara (DBKU) deka ngemanahka agi Atur Pengawa Standard (SOP) bekaul tambai Ibu Pertiwi ti labuh ari tiang iya di Dataran Ibu Pertiwi apin lama.

Sapit Menteri Utiliti enggau Telekomunikasyen, Datuk Dr Abdul Rahman Junaidi madah, tambai nya ditemu labuh ketegal kabel putus sereta charik ketegal kabut enggau ujan bangat ti nyadi kena Hari Satu tu tadi.

Beduduk ari pekara tu, iya madahka tambai Ibu Pertiwi udah diganti tekala nya pengudah penanggul nya nyadi.

“Nya alai, SOP baru udah diperunding kami pengudah penanggul nya laban kami terus nganti tambai nya ba hari ti sama dalam timpuh 24 jam, nya mih SOP kami.

“Kami mega nentuka kualiti tambai ti baru diganti nya manah agi enggau ngemanahka kabel ti udah bisi,” ku iya.

Abdul Rahman bejaku munyi nya lebuh ditanya pemberita rambau Program Nikika Tambai Ibu Pertiwi ba Dataran Ibu Pertiwi, kemari.

Iya ti mega Menteri tu megai tanggungpengawa ba DBKU madah, tambai Ibu Pertiwi deka diganti enggau tambai baru ninting bulan beserimbai pengawa nikika tambai ti diatur ninting bulan.

Ku iya, DBKU mega deka nungkap kualiti kereban ti engkeman dikena ngatur pengerami nikika tambai nitihka chara ari menua bukai.

“Kitai udah nganjung bala pemesai meresa kualiti tambai ti dikitau ba mayuh bengkah mengeri di serata dunya.

“Naka diatu kami udah meresa tambai nya di Kuala Lumpur sereta mega di Istanbul, Turki,” ku iya. Abdul Rahman mega bisi meransang orang dagang menua tu ngambi sida ulih ngasilka tambai Ibu Pertiwi ti bekualiti.

Program nikika tambai Ibu Pertiwi kemari dipenyadika Sapit Premier Sarawak, Datuk Amar Douglas Uggah Embas kelimpah digulu sekeda pemesai bukai baka Sapit Menteri Pemansang Infrastruktur, Datuk Aidel Lariwoo, Sapit Menteri Pemansang Penyangkai Kapal, Datuk Majang Renggi, Datuk Bandar Kuching Utara, Hilmy Othman enggau bala bukai.