KUCHING: Komiti Besai Servis Perintah Nengeri Sarawak (SPANS) dikeandal ulih meri servis ti manah, likun enggau ulih dipechaya dikena ngelanchar pejalai Strategi Pemansang Pengudah COVID-19 2030 (PCDS 2030) ba taun dudi.
Menteri Dagang Temuai, Industri Kreatif enggau Seni Pemerindang (MTCP), Datuk Seri Abdul Karim Rahman Hamzah madah, servis perintah nya endang sebengkah pugu menua.
Ku iya, nya alai beguna amat SPANS ngembuan servis ti manah, tegap enggau lurus ati ba pengawa meri servis bekualiti ngagai rayat seraris enggau PCDS 2030.
“Nya alai, transformasyen patut dikunsi enggau dikerandau ngambi pejalai insiatif ulih diatur beraban ti mungkur SPANS, Pengatur enggau Pemansang Modal Mensia (HRDM) sereta ejensi bukai.
“Kitai ukai semina beguna orang gawa perintah bepenau tang ngembuan pengelandik enggau ulah ti engkeman maya bejalaika pangku pengawa sida.
“Tu gerah besai dalam SPANS ba pengawa ngambi pengereja pengawa ti patut lalu sida ti patut ulih niki pangkat ba timpuh ti engkeman,” ku iya.
Karim mansutka jaku nya lebuh macha teks jaku Premier Sarawak, Datuk Patinggi Tan Sri Abang Johari Tun Openg rambau Pengerami Raya Ngiling Bidai Gawai Dayak SPANS 2023 ditu, malam kemari.
