KUCHING: Penyampau orang kampar di Sarawak nurun ngagai 89 ba taun siti nyin kemari bepelasarka rikod.
Menteri Pemansang Orang Indu, Anak Mit enggau Pengelantang Raban Bansa Datuk Sri Hajah Fatimah Abdullah madah, 71 peratus ari sida nya orang lelaki seraya 29 peratus indu “Entara kebuah sida tu ngampar ketegal nadai endur diau bisi 24 peratus, nadai pengawa (22), penanggul pengerai runding (13), penanggul ruang bilik (7), gian dadah (10) enggau kebuah bukai baka kala dijil enggau nadai kaban belayan.
“Enti dipeda ari sukut bagi menua ba Sarawak, Bagi Menua Kuching ngerikod penyampau orang kampar pemadu mayuh iya nya 42, dientudika Sibu (25), Miri (8), Bintulu (7), Samarahan (3) enggau Sarikei (3),” terang iya.
Fatimah bejaku munyi nya ba aum pemberita pengudah Aum Komiti Pengatur Orang Kampar Sarawak (JPGS) Bil.1 2023 di Wisma Bapa Malaysia ditu kemari.
Enti dibanding enggau rikod sebedau tu ku iya, statistik orang kampar ba taun 2022 bisi nurun penyampau 51 peratus ari taun 2021 iya nya 174.
“Taun pemadu mayuh ngerikod orang kampar kenyau ari 2016 iya nya ba taun 2019 enggau 2020 rambau pengerekai pandemik Covid-19 iya nya 114 enggau 237, manggai tiga angka.
“Ba taun 2016 bisi 43, 2017 bisi 84, 2018 bisi 35, niki ngagai 114 iku ba taun 2019, niki ngagai 237 ba taun 2020, udah nya nurun ngagai 174 ba taun 2021 ngujungka nurun ngagai dua angka ba taun 2022 iya nya 89,” ku iya.
Iya udah nya madah, pekara orang kampar ba menua tu nyadi penanggul ti mayuh leman (kompleks) lalu mesti diputar ngena chara alus.
“Nya alai, arapka pengawa begulai enggau kerejasama raban strategik ulih diatur dikena mutarka penanggul tu enda ngira ejensi perintah nengeri tauka perintah besai, institusyen peribit, raban ukai dikuasa perintah (NGO) enggau raban tuai ungkup pengelantang komuniti di Sarawak,” ku iya.
Sama bisi datai Sapit Menteri Pemansang Orang Indu, Anak Mit enggau Pengelantang Raban Bansa II Mohamad Razi Sitam, Sekretari Mendam KPWK Noriah Ahmad enggau ke bukai.
