KUCHING: Ubah ba reti jaku ‘bumiputera’ dibaruh Pekara 161A Kunstitusyen Perintah Besai deka mutarka enggau nerangkan pasal status hak ‘anak negeri’ Sarawak ari sukut undang-undang.

Presiden Serakup Besai Gerempung Orang Ulu Sarawak, Malaysia (Forum) Kennedy Chukpai Ugon madah, ba pugu iya ubah meri kuasa ngagai Perintah Sarawak nentuka status anak nengeri deka ngintu, nyaga sereta ngubah status anak asil nikah champur entara apai indai bumiputera enggau ke bukai.

“Tu nyengkaum bansa asal baka Bagatan, Bakong, Bemali, Berawan, Dali, Lakiput, Miriek, Narom, Saban, Tatau enggau Tring ke udah lama nadai diripihka nyadi bumiputera ba undang-undang.

“Bekau ari nya, sida tu udah dikelaungka ari segi hak lebih enggau napi mayuh penanggul enggau pemedis.

“Nya alai, nyema ubah nya dikemendar, nya deka ngaku sida ari sukut undang-undang nyengkaum ngasaika hak lebih nitihka pematut,” ku iya madah ngagai Suara Sarawak.

Kenu ku Adun Murun, chukup mayuh kisah anak nikah champur entara apai indai bumiputera enggau ukai bumiputera di nengeri tu ngasaika pemedis ketegal atur ti kelalu enda adil.

“Ambika chunto, sida enda ulih tama ngagai palan pelajar tinggi ti begunaka bukti status bumiputera enggau nyema bisi sida nya ditemu, nya semina pemutus ba renggat pun.

“Status undang-undang tetap sebaka – ukai anak negeri. Mayuh peminta ditulak ketegal raban pengereja pengawa ti nitihka atur tafsiran undang-undang.

“Kelimpah nya pengudah apai indai midang, anak ke nikah champur tu mega nadai bisi hak ngagai tanah asal enggau hak adat bumiputera (NCR) ke datai ari apai indai kandung.

“Taja udah nyadi pengatur reta pesaka apai indai, sida nyau minta diri sebilik ngetanka tanah nya. Enti nitih, tanah nya enda ulih dipindah nama orang ngempu,” ku iya.

Nangkan ke nya, ku iya bisi penemu madah pengawa mindahka hak ngempu nyangka dikemendar tang undang-undant besurat tetap sama enggau enda ulih dilaban.

“Pengawa nyiri ketuai baka Pemancha, Penghulu, Tuai Raban Bansa enggau ke bukai mega begunaka status bumiputera baka ke diripih dalam ‘Jadual Ordinan Tafsiran Negeri’ enggau Kunsitusyeyn Perintah Besai.

“Nya mega ulih dikinsil enggau diangkat nengah kedalih sida ukai bumiputera ke sah. Taja penemu nyangka ulih dibantai enggau ditulung, tang iya ke nyata sida agi enda sah,” ku iya.

Kelimpah ari nya, ku iya jaku bumiputera endang jaku politik ke enda sama reti enggau penerang pasal reti “anak negeri”.

“Sebagi bumiputera ngumbai diri sida bumiputera, sida ngasaika semua pemaik enggau hak, tang kebendar saru ke ngujungka nyadi tanda tanya status ke nyemetak nitihka undang-undang.

“Nya alai, perambu ubah nya sekalika dikemendar tauka undang tauka undang-undang baru, nya deka mutar semua penekul.

“Ngarika raban Forum, kami besemaya deka terus nyukung perambu ubah nya lalu minta semua Adun enda ngira kuing penemu politik beka meri sukung awakka iya ulih dikemendar ba nengeri tu,” ku iya.

Nerang silik, ku iya perambu nya senutuk laban jam diatu rayat ba nengeri tu udah lama merinsa ketegal atur ke enda adil enggau patut diubah lengkas.

Sarawak merambu ubah reti ‘bumiputera’ dibaruh Pekara 161A Kunstitusyen Perintah Besai dikena meri kuasa ngagai perintahn nengeri ngaga pemutus enggau nentuka bansa ba nengeri tu diaku nyadi anak negeri tauka rayat asal nitihka undang-undang nengeri.