KUCHING: Pelakun veteran, Steven Seagal entara orang diperambu deka datai beserimbai Pengerami Filem enggau Anugerah Entarabansa ASEAN (AIFFA) 2019 ba ditu ari 25 nyentuk 27 April.

Iya diperambu deka diau ba Kuching sepanjai tiga hari pengerami tu begulai enggau aritis di menua tu enggau entarabansa bukai baka ratu Asean Sheila Majid enggau ex-ketuai pengerami Asia’Got Talent, Marc Nelson enggau Rovilson Fernandez.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, orang ti rinduka Seagal, madah Sarawak benasit laban ulih narit pelakun ti tebilang ungkup AIFFA taun tu.

Iya (Seagal) deka betemu enggau peminat ba sesi begulai enggau peminat ba Kompleks Kort Lama kena ka 27 April urung pukul 3 lemai,” ku iya ba aum media ba sebengkah hotel ti tebilang ba ditu, kemari.

Menteri Dagang Temuai, Seni enggau Main Asal Datuk Lee Kim Shin, Sekretari Tetap Opis Menteri Dagang Temuai, Seni, Main Asal, Nembiak enggau Lumba Hii Chang Kee sereta Direktor AIFFA, Liyan Tajang.

Steven Seagal

Sebedau tu, pelakun filem ti kala ngangkatka nama AIFFA iya nya Datuk Jackie Chan, Donnie Yen enggau Tan Sri Michelle Yeoh.

AIFFA 2019 ba renggat keempat pengerami dua taun sekali tu chukup besai reti ungkup Sarawak beserimbai enggau Kimpin Nemuai ke Sarawak ku Abdul Karim.

“Tu siti program ti ulih ngangkatka nama Sarawak dalam industri dagang temuai enggau filem, lebuh Aiffa diatur ba ditu ba taun 2013, festival tu udah ngerembai lalu nyadi siti pengerami filem ba menua Asean” ku iya.

Iya nambah siti pun pengawa nyengkaum nyain Sempekat Pemereti (MoU) enggau Alibaba Pictures Group, sebuah serikat produksi filem China ba baruh Alibaba Group, ti udah ngasilka filem pechah panggung baka Mission: Imposible-Fallout and Star Trek Beyond.

“Sida deka datai nyain MoU enggau AIFFA ngambi tama ngagai Sarawak tauka Malaysia lebuh ngaga filem.
“Serikat produksi besai ti datai ngagai Kuching nunjukka sida arap ngagai AIFFA lalu deka nemu lebih mayuh pasal Sarawak enggau Malaysia” ku iya.

Steven Seagal

Nambahka nya, Livan madah Malam Gala AIFFA 2019 diperambu kena ka 27 April lalu 29 filem deka dirintai ari menua baka Malaysia, Indonesia, Singapura, Thailand, Myanmar, Brunei, Kemboja, Vietnam, Laos enggau Filipina bepekit ngulihka anugerah kategori Begambar Filem ke pemadu manah-Palan Begambar Drama Pemadu Manah-Aksi, Palan Begambar Pemadu Manah-komedi,Pelakun Lelaki enggau Indu Pemadu Manah sereta Direktor Pemadu Manah.

“Filem ti dirintai deka dibantai maya 25 nyentuk 28 April tu meri peluang ngagai mensia mayuh ngambi nemu filem ti bepekit ba Asean” ku iya madah lalu mensia mayuh ulih meda filem nya enda bebayar ba Auditorium Kompleks Kort Lama ari pukul 10 pagi ngagai 8 malam ninting hari.

Iya nambah maya 25 April, ‘Party by the River’ kelai AIFFA 2019 deka dibuka ngagai mensia mayuh pukul 7 malam ba palan Tebing Kuching (Semak Hotel Grand Magherita).

“Pengawa enda bebayar tu madahka filem lalu bisi mantaika filem Nightmare in Bali: Kajeng Kliwon siti filem berantu dirakam ba Bali lalu diasil begulai enggau pelakun sereta krew ari Malaysia, Indonesia enggau Singapura” ku iya.

Livan madah mayuh macham pengerami udah dilanggur nyengkaum bengkel ‘Starcraft’ ba Restoran Budaha, Begunan Steamship Sarawak kena ka 25 April ungkup pelakun tempatan enggau jurumekap filem tauka barang ti rindu ba pengawa tu.

Kelimpah ari nya, AIFFA Biz World Day One ba Balai Kompleks Kort Lama kena ka 26 April mandangka licha filem digital enggau pengawa nyain MoU.

Bisi renggat milih pengelandik pegulai enggau pelakun filem entara bansa ari Hongkong mega bisi diatur.