STU ngansak KPM berundingka tiga pekara

MIRI: Gerempung Pengajar Sarawak (STU) ngansak Opis Menteri Pelajar Malaysia (KPM) berundingka tiga pekara bekaul tangga gaji DG56, Kod Atur Apai Indai enggau Penyaga sereta awak ngaga kelas tambah maya kemisi sekula.

Presiden STU Macky Joseph madah pekara tu patut diperunding ngambi ulih ngemanahka sistem pelajar enggau meri penguntung ngagai nembiak sekula.

“Kami deka terus ransing berunding, ngetan enggau nambahka pemanah status profesional sereta sosial pengajar seriris enggau rambai jaku iya nya ‘Keadilan Sosial dan Keamanan’.

“Tiga pekara ti dipadah tu deka meri pemaik ngagai nembiak sekula, pengajar enggau apai indai sereta opis menteri bekaul,” ku iya.

Macky mansutka pekara nya maya Aum Resolusyen Eksekutif Ke-2 STU ba sebuah hotel tebilang apin lama.

AUM STU…(duduk ari kiba) Kullin, Adam, Chung, Macky, Morni, Chan, Elizabeth, Theresa enggau raban STU ke bukai begambar kenang pengudah Aum Resolusyen Eksekutif Ke-2 STU ba sebuah hotel tebilang apin lama.

Kenu ku Macky, dalam resolusyen tu STU minta Gred DG56 ungkup bala pengajar ke udah datai ba Gred DG54, laban sida agi biak sereta bisi laluh gawa lebih ari 10 taun agi.

Nya alai, Gred DG56 nyadi sebagi ari peransang ngagai bala pengajar ke agi panjai servis sepengudah datai ngagai Gred DG54.

“Tambah mega, pengajar ti bepenau deka meri mayuh agi penguntung ngagai sistem pelajar enti terus ngiri penemu ngagai nembiak.

“Kena narit ati pengajar ngambika terus bejalaika pengawa enggau manah gred gaji ti lebih tinggi iya nya DG56 meseti ulih dijapai semua pengajar awakka enda semina tetap ba DG54 aja dataika sida pinchin,” ku iya.

Kelimpah nya, pekara kedua ti diperunding iya nya kaul basa tauka Kod Atur Apai Indai enggau Penyaga dalam nguruska pekara sentang pelajar anak sida.

“Apin lama ubah dalam Kod Atur Apai Indai enggau Penyaga kenyau taun 2017 lalu udah diputuska sida lalu udah dianjung ngagai Opis Pelajar Nengeri Sarawak (JPN Sarawak) awak diperunding enggau manah.

“STU ngarapka ulih nerima timbal ti manah ari JPN Sarawak bekaul enggau Kod Atur Apai Indai enggau Penyaga nya enggau lengkas,” ku iya.

Kena 5 Mei tu tadi, Serakup Profesyen Pengajar Menua (NUTP) ngelalau sekula primari enggau sekondari ba selampur menua nguna Kod Atur Apai Indai enggau Penyaga dikena nyaga pengelantang enggau pengelikun pengajar lebuh diau ba sekula.

Nangkan nya, ku Macky pekara ketiga ti dipejurai ba aum nya bekaul enggau awak ngambi kelas tambah maya kemisi entara pengajar enggau nembiak sekula.

“Kami nerima kompelin ari raban kami empu ti diasuh ngaga kelas tambah maya musim pengerami Gawai enggau Raya apin lama.

“Ketegal ngaga kelas tambah nya, nembiak sekula enggau pengajar nadai awak begulai enggau ruang bilik sida empu sereta dikira udah enchuri jam kemisi sida,” ku iya.

Macky madah, taja bisi dipesan Menteri Pelajar Dr Maszlee Malik ba sebuah video awakka piak sekula anang ngaga sebarang aktiviti ba sekula musim kemisi tang sida nadai nerima perintah rasmi, nya alai STU ngansak Opis Menteri Pelajar awakka nitih perintah ti digerah Dr Maszlee Malik nya.

Sama bisi datai ba aum nya Mandal Presiden Morni Askha, Mandal Presiden STU Zon Selatan Kullin Djayang , Mandal Presiden STU Zon Tengah Adam Prakash , Mandal Presiden STU Zon Utara Elizabeth Dikertina enggau ke bukai.

Suara Sarawak